11 nyied 18 hauh, Cauhbingz Yen Senhveiz Yauzcuz Yangh Mbanjsinhcungh gyong laz haprwenz、 fouxlungz fouxsaeceij, geij cien boux Senhveiz gak cuz vunzlai doxcomz youq giz haenx, angqhoh Senhveiz Yauzcuz Yangh laebbaenz 20 hopbi.

Youq seiz angqhoh daihhoih, Swcigih Minzveij Gihgvanh Dangjveij cienciz fusuhgi Liengz Mung’yungz, Hocouh Siveij cangzveij、 fusicangj Lanz Gyangz, yenveij suhgi Cangh Yifuh faenbied gangjvah, doiq Yauzyangh 20 bi daeuj aeundaej hungloet bienqvaq caeuq cingzcik guh cungfaen haengjdingh, gujli gyoengqde fatok gijndei, doxgiet buekguh, muengh Yauzyangh gak cuz vunzlai vuenyungz youq ndei, ngoenzcog engqgya ndei.

Gyoengq lingjdauj caeuq hekyouz camgya angqhoh yizsi haenx caeuq Senhveiz gak cuz vunzlai itheij yawj le ciengz daihhingz Yauzcuz gofoux biujyienj gig miz daegsaek minzcuz naekna he. Dangngoenz yienjok gungh faen baenz 《Yauzyangh Swnghdai》、 《Yauzyangh Sing Gyong Ndei》、《Yauzyangh Mingh Hoengh Mizyinx》 sam aen ciengciet, youz 11 aen diuqfoux、go、siujbinj daengj gapbaenz, cungfaen yienh’ok Yauzyangh vunzlai geij bi neix daeuj aeundaej hwngfat cingzcik caeuq guhcaemz vwnzva saedceij lai cungj lai yiengh.

( Liuz Feih/刘 飞 Banh Ciuhbingz/潘秋平 Lij Hau/李 浩 Ya Fungh/夏 峰)