11 nyied 19 hauh, Cungzcoj Si Minzyijveij youq Ningzmingz Yen Minzcuz Cunghyoz cujciz haiguh bi 2015 bouxcoz nyezrauh Fwencuengh beizyin hozdung. Cungzcoj Si Minzcunghveij cujyin Cau Lungz、 Siminzyijveij cujyin Liengz Cinbyauh caeuq daengx si guh hong minzyij bumwnz bouxfucwz、 lauxhangz daengj 34 boux bae daengz yienhciengz yawjngonz Fwencuengh beizyin. Beizyin hozdung cujciz dangdieg 50 lai boux bouxcoz nyezrauh bouxgyaez Fwencuengh camgya beizyin. Beizyinbanh iucingj Guengjsae Canghfwen Bouxcuengh boux mizmingz、 Ningzmingz Yen Fwencuengh fwenvuengz Ganh Saugwngj lauxsae daeuj hwnjdangz.

Gaenh geij bi neix daeuj, aen si neix gak gaep minzyij bumwnz doenggvaq fwen hingzsik, haenqrengz senhconz lohsienq fuengcim dangj caeuq cwngcwz fapgvi guekgya, aeundaej cingzcik gig ndei. Caenh’itbouh fatyiengz、 swnjcienz Boux- cuengh conzdungj vwnzva maenhndei, coicaenh Bouxcuengh vwnzva hoenghhwd hwngfat.

(Luz Gunh/陆 琨)