11 nyied 19 hauh, Hwngzyen Minzcuz Cunghyoz daengxcungq lauxsae hagseng doxcomz youq ciengzyindung, doengzcaez ciep daeuj minzcuz cunghyoz gaiq daihcibbet yindungvei.

Gaiq yindungvei neix guh song ngoenz, miz denzging caeuq saujsu minzcuz conzdungj dijyuz daengj ca mbouj geijlai 20 aen doxdax hanghmoeg. Ndawde, saujsu minzcuz conzdungj dijyuz hanghmoeg miz ringx gvingz、 sam vunz haizgieg doxdax、 bau aendomq daengj. Doxdax hanghmoeg hingzsik lai yiengh, hagseng gaengawq bonjfaenh gyaez caeuq daegciengz senj camgya doxdax, hawj hagseng youq seiz yindung ndaej cangqndang, youq seiz yindung daejniemh gij angqyangz guh ndaej baenz.

Hwngzyen Minzcuz Cunghyoz dwg aen yienh neix aen cogaep cunghyoz seizneix guh Cuengh Gun song cungj saw vah sonhag dandog he, hagdangz “aeu vwnzdij coi sonhag, aeu daegsaek caux binjbaiz” guh hong lohnaemj, fatyiengz minzcuz vwnzva yienh’ok banhhag daegsaek. Youq guh ndei hagseng binjdwz gyauyuz caeuq vwnzva gyauyuz doengzseiz, haeujlaeg haiguh suciz gyauyuz、 minzcuz doxgiet cinbu gyauyuz. (Cinz Siujdauh/覃小涛)