Ngoenzneix, gou youq gwnz dennauj yawj duenh sibinz he, dahniq ndaw sibinz heuh Yangz Bei, mwh de lij iq aenvih loeklak daemj dienh, song fwngz deng goenq lo, gwndaenj mbouj gag leix ndaej. Hoeng de mbouj fug gij minghyinh neix, de yungh gij eiqceiq giengiengz dingjnanz de, hag rox le yungh din guh saeh: Swiq naj、cat heuj、roi gyaeuj、gwn haeux. Engq sawj vunz siengj mbouj daengz haenx dwg, de gingqyienz yungh din cin cim nyib doxgaiq, yungh din siuq cibcihsiuq, baengh cungj dinfwngz neix gvaq ndei saedceij.

Yawj Yangz Bei gwnz vujdaiz, najrongh najriu, gou youh gag siengj hwnj Haijlwnz Gaijlwz boux cozgyah、gyauyuzgyah mizmingz Meijgoz neix. Mwh de ndaej bi buenq, aenvih fatndat daiq sang cix dingq mbouj nyi yawj mbouj raen, doengzseiz hix gangj mbouj ok vah lo, aen seiqgyaiq de daj seizhaenx hwnj couh bienq- baenz laepsaeng caeuq caemdingh. Hoeng couhdwg youq cungj cingz- gvang yienghneix, Haijlwnz Gaijlwz mbouj fug cungj mingh rwix neix, de haekfug cungjcungj gunnanz, hag rox doeg saw、sij cih、gangj vah, doeklaeng baenz boux vunz doiq sevei miz yungh he.

Lienzsiengj daengz gou swhgeij, gou miz fwngz miz din, seiq genga ndei raeuh, ndaw gwndaenj、hagsib bungz daengz di dwgrengz he couh lau, mbouj siengj bae guh, ra gak cungj leixyouz daeuj doi gij cwzyin swhgeij, yaeuh lauxsae, muenz bohmeh, roxnyinh swhgeij gig ak gig coengmingz. Gaxgonq gou cungj roxnyinh lumj Yangz Bei、Haijlwnz Gaijlwz cungj vunz neix gig hojlienz, souh baenzlai haemzhoj, dwgrengz bae gvaq saedceij. Seizneix siengj- siengj, gou cij dwg bouxvunz hojlienz! Seizneix youq aen sevei neix dwg baengh bonjsaeh gvaq saedceij, yienznaeuz gou seizneix saedceij gvaq ndaej gig ndei, mbouj you gwn mbouj you daenj, hoeng cungj miz ngoenz ndeu gou yaek biek bohmeh bae, gag gvaq saedceij, seizhaenx gou wnggai baenzlawz gag bae gvaq saedceij ne?

Ngoenzneix gou rox lo: Gunnanz caeuq daemjdengj dwg gizgiz seizseiz cungj miz, raeuz ndaej guh haenx couhdwg siengj banhfap haekfug gunnanz, lumj Yangz Bei yienghneix giengiengz、 sim’angq bae gvaq saedceij.

(roek nienzgaep Ganz Yizfanz)