Daeggoj caeuq Dahsih doxcaez byaij ma ranz, henz loh ndonj ok duz ma ndeu, raeuq coh song boux de. Dahsih lau dwk mbouj gamj doengh. Daeggoj cix mbeihung byaij youq baihnaj, lij daejheiq gig cuk naeuz: “Gaej lau, riengz gou byaij!”

Daeggoj daj ndaw daehsaw mbon ok saejdaeuz, vut hawj duzma, duzma raen le, mboujdanh mbouj raeuq lo, lij bi rieng coh gyoengqde dem.

Daeggoj miznaj dwk doiq Dahsih naeuz:“Yawjraen luba, daxboh gou dwg boux yinghyungz, daxboh gou bang vunz gaeb gvaq bouxcaeg, ndaejdaengz gungh’anhgiz biujcangh gvaq, gou boux dang lwg neix hix mbouj ca ba!”

Dahsih dingq le lienzlienz haenh mbouj dingz. Ma daengz ranz, Daeggoj yied siengj yied gikdoengh, cungj yaek ninz mbouj ndaek lo.

Ngoenz daihngeih gyanghaet, Daeggoj ndwn youq naj conghcueng, yawjraen daengngoenz ngamq swng hwnj haenx, ndawsim gag lwnh swhgeij:“Gou dwg bouxsai, gou caeuq daxboh ityiengh mbeilaux!”

Seizhaenx, ndaw ranzdajcaemx cienz daeuj sing yiengjcaca, dwg daxboh yungh fagdaeqmumh dienh- doengh daeuj daeq mumh.

Cungj sing neix hawj Daeggoj lienzsiengj haujlai. “Daxboh vih maz daeq mumh ne? Bouxsai cungj aeu daeq mumh ba!” De youq ndaw fuengz de baenqbeq yaep ndeu, “Mboujndaej, danghnaeuz gou mbouj daeq mumh, yienghneix gou lij dwg lwgnyez bw!”

Caj gwn haeuxcaeux sat daxboh hwnjban le, Daeggoj laeglemx aeu fagdaeqmumh dienhdoengh daxboh daengz ndaw fuengz de, dajsuenq daeq mumh de. Hoeng de yawj ndaw gingq haujlai nanz, cungj ra mbouj ok saek diuz mumh daeuj.

Daeggoj yaepyaep aenda, sawq- mwh siengjhwnj aen banhfap ndei ndeu, swhgeij mbouj dwg miz bwnda ha? Bwnda caeuq mumh yawj hwnjbae ca mbouj geijlai, hixnaengz aeu bwnda daeq bae ndaej lo! Gangj guh couh guh, Daeggoj geij faen cung couh daeq song diuz bwnda bae ndoqndat lo. Yienzhaeuh saenzheiq vauvau bi aen’gyaeuj de, doiq aengingq naeuz:“Neix cij dwg boux vunzsai biucinj he!”

Daeujdaengz hagdangz, daihgya baez yawjraen Daeggoj, cungj gyaengjyouq lo, miz vunz lij goemq bak riu dem, Dahsih lanz Daeggoj cam:“Daeggoj, bwnda mwngz bae gizlawz la?’

“Gou daeq bae lo!”

“Bwnda dwg canggyaeu hawj vunz ndeiyawj, mwngz daeq de bae, yakyawj lai lo!”

“Gou hag daxboh gou, daxboh gou dwg bouxsai mbeilaux he, moix ngoenz cungj daeq mumh, gou mbouj miz mumh couh daeq bwnda lo.”

Dahsih dingq Daeggoj gangj le, riu dwk hwet gungj bae, naeuz: “Hag bouxwnq, aeu gaengawq gij diuzgen swhgeij, vunzhung daeq mumh couh bienq ndaej engq mbauqndei, mwngz daeq bwnda cij bienq ndaej engq yakyawj!”

Daeggoj dauqdaej mingzbeg gvaqdaeuj lo, ganjgip siengj banhfap hawj bwnda swhgeij vaiq di maj okdaeuj.

(Sunh Yingjcauh)