Youq ndaw seizcou, haujlai bouxlaux cungj gamjdaengz ndang naet rengz naiq, ndigah, conhgyah daezsingj naeuz, bouxlaux siengj ndang cangq rengz maengh, itdingh aeu guh daengz baihlaj “seiq gaiq”:

It gaiq gikgyanx, habdangq ok rog bae guh hozdung, lumj menhbuet、youzbyaij、dwkgienz、diuqfoux、guh dijcauh daengj cangq ndang hozdung, youq ranz seiz hix aeu guh di hongranz ndeu, lai hozdung aenndang, gaej naengh youq nanz lai.

Ngeih gaiq naetnaiq gvaqbouh, mwh guh lienhndang、hongranz seiz aeu anbaiz ndaej ndei, guhhong yietnaiq doxgiethab, yienghneix cij ndaej hawj gak aen cujciz gi’gvanh aenndang ndaej daengz yietnaiq ndei.

Sam gaiq gwn imq gvaqbouh, gwn imq gvaqbouh rox hawj ndangnaek demgya le fat biz, fat biz rox hawj hezdangz、hezyaz、ganhyouzsanhcij、danjgucunz swng sang.

Seiq gaiq bungz saeh fatheiq, bouxlaux cingzsi fubfeb, bungz saeh mbouj swnhsim seiz fatheiq, rox hawj gak aen gi’gvanh cingqciengz sengleix goengnaengz deng gauxca, yungzheih yaeuhfat baenz dungx- saej biux naeuh、hezyaz sang、gvanh- sinhbing daengj bingh. Ndigah, mwh bungz daengz gij saeh mbouj swnhsim seiz, wng gamhanh swhgeij gaej ndatheiq.