Makit dwg cungj mak seizcou ciengz raen ndawde cungj ndeu, yingzyangj gyaciz gig sang, gwnfap hix miz haujlai yiengh, ndaej nap aeu raemx、dak sauj、cimq laeuj. Baihlaj gaisau seiq cungj yunghfap, dawz daeuj fuengzceih gij bingh seizcou ciengz raen haenx:

1、Raemxmakit heuz raemxoij gwn, ndaej yw conghhoz hep.

Yenzliuh: Raemxmakit、raemxoij gak boi ndeu.

Fuengfap: Ciuq amqbak swhgeij heuz ndei heuz yinz, menhmenh ndoet roengzbae.

2、Raemxmakit heuz raemx byaekginzcai gwn, ndaej yw hezyaz sang.

Yenzliuh: Raemxmakit、raemx byaek- ginzcai gak boi ndeu.

Fuengfap: Dawz song cungj raemx neix gyaux yinz, yungh raemxraeuj soengq gwn.

3、Raemxmakit heuz raemxmakcengz gwn, ndaej sek dungx, hawj vunz lai gwn ndaej doxgaiq.

Yenzliuh: Aeu 10 aen makit, raemx- makcengz caeuq dangzrwi gak geng ndeu.

Fuengfap: Nap makit aeu raemx, gyahaeuj raemxmakcengz caeuq dangzrwi gyaux yinz gwn roengzbae.

4、Raemxmakit gya gyoijhom gwn, ndaej fuengz haexgaz.

Yenzliuh: Aeu 10 aen makit, aen gyoijhom ndeu, 50 gwz cijvaiz, geng dangzrwi he.

Fuengfap: Makit cawz naeng, bok naeng gyoijhom ok le caeuq cijvaiz itheij nyaenj yinz, heuz dangzrwi gwn.

Makit dwg cungj ywbouj ndeu, gwn de ndaej bouj haw cangq dungx. Boux ndang haw、boux yingzyangj mbouj ndei, lai gwn di makit roxnaeuz makit sauj ndeu, ndaej bang hoiz dauq ndang ndei. Aenvih makit hamz miz danbwzciz、anhgihsonh、lonjlinzcij、veizswnghsu caeuq gvangvuzciz daengj lai cungj yingzyangj cwngzfwn, caemhcaiq cujyau dwg dangzmakit, yungzheih deng ndang vunz cigciep supsou.