10 nyied 31 hauh banhaemh, Sanglinz Yen hoizfuk cuengqok sinhvwnz Vahcuengh, bouxyawj Vuz daxbuz angqyangz dwk naeuz:“Yungh Vahcuengh raeuz cuengqok, bouxgeq dingq rox yawj rox, roxnyinh gig caenciet.”

Ciuq cam rox, Sanglinz Yen youq 2005 nienz 9 nyied cingqsik cuengqok 《Sinhvwnz Vahcuengh Sanglinz》gvaq, doeklaeng aenvih mbouj miz vunz daengj yienzaen mbouj cuengqok aen lanzmoeg neix. Seizneix, Sanglinz Yen cingq aeu “ranzcoj Bouxcuengh·Sanglinz goqhoh ndangdaej” guh hwngfat canloz, haenqrengz cauxlaeb Guengjsae aen yienh daegsaek lijyouz. Vih fatyiengz Bouxcuengh conzdungj vwnzva, dajcaux deihfueng Bouxcuengh vwnzva binjbaiz, banh aen densi lanzmoeg gig miz daegsaek seizdaih、 minzcuz、 deihfueng vah minzcuz he, Sanglinz Yen Yenveij Cwngfuj gig yawjnaek, cienmonz ok cienz haeujcoengh.

Seizneix, 《Sinhvwnz Vahcuengh Sanglinz》moix geiz cuengqok sinhvwnz 12-15 diuz, cuengq 20-25 faen cung, ndaej daengz vunzlai Bouxcuengh haengjgyaez.

(Lij Dauyungj/李道永)