●Gaenh geij bi neix daeuj, Dwzbauj Yen gyagiengz yenzswnghdai minzcuz vwnzva yenzgiu, youq Cwngzgvanh Cin Yinzsanh Siujyoz daengj hengz- guh ndawbiengz minzcuz vwnzva swnjcienz vunzcaiz son’gyauq gunghcwngz, aeu ngeihyienz ndokmax、Gienzcuengh、 foux- saux daengj minzcuz vwnzva haeuj hagdangz, dajcaux minzcuz daegsaek hagdangz vwnzva, minzcuz banhhag fuengcim mboujduenh cangqheiq majhung.

(Cinz Siujbeih)

●Cauhbingz Yen gaengawq diegbya lai、 swhyenz swnghdai vanzging ndei、nungzyez caeuq linzyez dwzcanj swhyenz fung- fouq, haenqrengz hwngfat batgak daengj diegbya swnghdai daeg- saek canjnieb. Dangqnaj, daengx yienh ndaem batgak 8 fanh lai moux. Seizneix，batgak daengz seiz baenz sou, dangdieg vunzlai gaenxmaenx ciengjsou dak hawq, ciengjaeu ndaej ndei soucingz.

(Liuz Feih Vangz Siuh- yenz)

●Bineix daeuj, Lingzyinz Yen cungfaen fatok swhyenz ndei caeuq diegyouq ndei, yungh “cwngfuj doidoengh、 giyez daiq- doengh、 hawciengz yiendoengh、 bouxguhnaz cawjdoengh” guh lohnaemj, hwngfat ndaem gonengznuengx ciengx nonsei aeu ndaej ginghci yauqik gig ndei, daengz seizneix, aen yienh neix ndaem gonengznuengx mienhcik 5 fanh lai moux, gaenq fat nonsei lwg 51263 dungh, gujsuenq reh moq canjlieng 41010.4 rap, canjciz 7586.92 fanh maenz.

(Siuh Fazlingz)

●Mboengqneix, Fuconh Yauzcuz Swciyen Fuyangz Cin Goenghai Anhgenh Faplwd Banhsaeh Fugsaeh Cungsim yiengq vunzlai cuengqhai. Anhgenh vangjcan baugvat mizgven ancienz swnghcanj fuengmienh daengj faplwd fapgvi senhconz、 banhsaeh hongsaeh ceijnamz、 bonjdieg gyaeujlungz giyez genjgai daengj fugsaeh, vunzlai hwnj vangjcan guh ndaej cazcam、cingjgouz、 sienduenq daengj lai hangh faplwd banhsaeh fugsaeh, gemjmbaeu mizgven giyez gunghswh vih banhsaeh baebae mama, neix ndaej daengz giyez gunghswh angqcoux.

(Cinz Yengiz)