Hohndok gyaeujhoq baenzin caeuq meh- mbwn bienqvaq miz gvanhaeh maedsaed, ndigah, seizcou aeu daegbied haeujsim cij ndaej.

Fap 1: Aeu haeujsim fuengz nit bauj raeuj. Boux hohndok baenzin seizcou aeu haeujsim gaej hawj deng nit, wng gibseiz daenj buh na mad na. Deng nitgyoet le aeu gibseiz yungh raemxndat daeuj oep, coi mbangjgiz hohndok lwed lae baedauq. Yaek haeujninz gaxgonq yungh raemxndat cimq din, ciengzseiz aeu raemxndat oep giz hohndok gyaeujhoq. Gyangngoenz lai ok rog ranz bae dak ndit.

Fap 2: Naengh eij sang. Boux hohndok baenzin wng caenhliengh naengh eij sang, hawj din ndaej iet soh, danghnaeuz naengh seiz ga ciengzseiz deng hoet haeuj, rox hawj hohndok deng at sieng.

Fap 3: Hableix yindung, gamhanh ndang- naek. Boux baenz hohndok in wng habdangq okbae guh di yindung ndeu, lumj youzbyaij daengj daeuj demgya rengz noh, hawj hohndok onjdingh. Doengzseiz ndaej doenggvaq lienh- ndang caeuq gwnndoet daeuj gamhanh ndangnaek, daeuj gemjmbaeu hohndok fudanh.

Conhgyah daezsingj naeuz, boux baenz hohndok in wng siuj bae benz bya、hwnj laeuz roengz laeuz、maeuq naengh、dwk daigizgenz. Aenvih gij yindung neix rox hawj hohndok deng at sieng youqgaenj.

Fap 4: Gwnndoet doxdaengh, geih gwn huqsoemj daiq lai. Gwnndoet soemjndaengq doxdaengh dwg aen hothoh ceihyw caeuq fuengzceih hohndok youqgaenj ndeu. Lai gwn byaekheu, haeujsim bouj gai bouj veizswnghsu, gamhanh sup haeuj danjgucunz daiq lai.