1、Makit. Ndaw makit hamz miz gai、linz、diet gig lai, doengzseiz hamz miz lai cungj veizswnghsu caeuq anhgihsonh daengj doxgaiq dem, dwg gij huqndei bouxlaux、mehmbwk、boux ndang nyieg lwedhaw caeuq boux guhhong naetnaiq gvaqbouh gwn; mehmbwk daiqndang ndaej lai gwn di, mboujdanh doiq lwgndawdungx miz yingzyangj, hix ndaej hawj mehdaiqndang saeknoh hoengzmaeq、sailwed doengswnh, danghnaeuz cawx mbouj ndaej makit ndip, cawx makit sauj gwn caemh ndaej.

2、Namzgva. Ndaw namzgva hamz miz danbwzciz doenghgo、lauxbaeg nding doxgaiq、veizswnghsu caeuq anhgihsonh、gai、sinh、diet、guh、linz daengj, ndawde, guh dwg habbaenz gij cwngzfwn veizswnghsu B12 ndawde cungj ndeu, ndaej bangcoh hungzhezgiuz ndaw lwed cingqciengz yinhsoengq; sinh ndaej cigciep yingjyangj hungzhezgiuz goengnaengz habbaenz; diet dwg caux hezhungzdanbwz gihbwnj veizlieng yenzsu ndawde cungj ndeu, cienzbouh dwg gij yingzyangj doxgaiq ndei bouj lwed haenx.

3、Oij. Ndaw oij hamz miz lai cungj veizlieng yenzsu, baugvat diet、sinh、gai、linz、mungj daengj, ndawde hamz diet ceiq lai, moix goenggaen oij hamz miz diet 9 hauzgwz, baiz youq sojmiz lwgmak ndawde vih daih’it. Mboujgvaq, oij dwg singq caep, boux dungx hawcaep wng noix gwn di.

4、Makcauj nding. Ndaw makcauj nding hamz miz veizswnghsu caeuq dangzoij、gak cungj anhgihsonh daengj, ndaej ciengx lwed hoh lwed, gaijndei lwed lae baedauq. Caeuq noh maknganx boiqhab gwn, mboujdanh ciengx lwed bouj heiq, lij ndaej meijyungz dem.