Guek raeuz miz coenz vahsug ndeu naeuz:“Bouxlaux gwn cuk, fuk lai gyaeu nanz.” Bouxvunz geq lo, siuvaq hidungj nyiegdoiq lo, habdangq gwn cuk saedcaih mizleih siuvaq, hoeng ngoenzngoenz gwn cuk, dauqfanj doiq ndangdaej fouz leih.

Ciengzgeiz gwn cuk miz baihlaj geij aen yinhsu mbouj ndei: Aenvih gwn cuk mbouj yungh heuj bae nyaij mienz, siuj nyaij rox hawj diuzheuj doiqvaq engq vaiq; nyinzsei ndaw cuk hamzliengh haemq siuj, doiq bouxlaux baiz doeg mbouj leih.

Gwn haeux aeu yungh heuj nyaij, heuj nyaij mboujdanh nyaij naedhaeux yungz bae, doengzseiz lij ndaej coi raemxmyaiz iemqok, gij meiz ndaw raemxmyaiz hix ndaej siuvaq denfwnj. Gwn haeux mbouj yungh heuj myaij, denfwnjmeiz ndaw myaiz couh mbouj naengz dawz gij denfwnj ndaw cuk cungfaen faengej baenz dangzmegngaz, baenzneix couh yingjyangj siuvaq. Raemx- myaiz lij ndaej cunghab veisonh、coih ndei nemmuek aendungx, gwn cuk seiz conghbak ca mbouj lai mboujmiz raemxmyaiz iemqok, yienghneix couh nanz baujhoh ndaej nemmuek aen- dungx lo.