Ngoenzneix hwnj goqmeijsuz, lauxsae son dou “ci veh”. Lauxsae naeuz:“‘Ci veh’ couhdwg dawz ndik maeg ndeu ndik roengz bonjdozveh bae, yienzhaeuh yungh rengz ci, ci ok mbouj doengz dozanq daeuj!”

Caen dwg miz cungj saenzgeiz neix lwi? Ndaw gyausiz sawqmwh nauhyied hwnjdaeuj, daihgya cungj roxnyinh miz eiqsei.

Gou caeux couh nyaenx mbouj youq ndawsim gikdoengh lo, gou ganjgip dawz gangbit okdaeuj, duet daepbit bae, yungh rengz baez nyaenx, ndik maeg ndeu couh ndik youq gwnz bonjdozveh lo. Hoeng yawj ndik maeg neix, gou baenzlawz hix siengj mbouj ok de ndaej bienqbaenz gijmaz dozanq. Dou ciuq gij guhfap lauxsae gangj haenx hainduj ci. Gou yungh daengx ndang rengz bae ci, hoeng gou cij ci baenz diuz dah he, cungj gvaiq gou daiq yungh rengz lo. Neix caeuq gou siengj ci baenz gij veh haenx siengca daiq lai lo, baenzlawz guh cij ndei ne?

Couh youq gou nyapnyuk mbouj miz banhfap seiz, lauxsae byaij gvaqdaeuj lo, cij raen lauxsae youq henz diuz “dah” haenx yaengyaeng ci coh baihswix, yienzhaeuh youh yaengyaeng ci coh baihgvaz, sawqmwh gofaex hung he okyienh lo. Yawjraen gij dozanq lauxsae ci okdaeuj haenx, dou sawqmwh angq dwk hemq hwnjdaeuj. Caen siengj mbouj daengz, ndik maeg ndeu gingqyienz ndaej bienqbaenz gofaex hung lumj caen nei.

Doeklaeng, gou youq gwnz gofaex neix daz gij saek gou gyaez haenx. Yawj daengz fuk doz neix, simcingz gou daegbied ndei, daegbied angq. Goq meijsuz neix caen dwg mizyinx lai lo, mboujdanh hawj gou dem cihsiz, vanzlij hawj gou angq raixcaix!

(seiq nienzgaep Linz Yingz)