Ngoenzhaenx, dou daengx ranz bae henz huz guhcaemz. Dou youq henz huz dap bungzciengq, ci rumzcou liengzsisi, gou angq- vauvau youq gwnz diegnywj guhcaemz.

Diegnywj umqnemnem, ninz youq baihgwnz gig cwxcaih. Sawqmwh, daj baihnaj gou mbin gvaq yiengh doxgaiq henj he. Gou baez yawj, laxlawz dwg duz biengzbeih henj he. Biengzbeih mbouj doengh douh youq gwnz duj va’aeuj he. Gou yaengyaeng byaij gvaqbae, ngamq maeuq roengz- daeuj, biengzbeih couh mbin deuz lo. Gvaq yaep ndeu, biengzbeih douh youq gwnz duj vamaeq he. Gou yaemj din yaemj fwngz byaij gvaqbae, ha, baez neix biengzbeih mbouj fatyienh gou. Yienghneix gou mbaetheiq sijsaeq cazyawj. Duzbiengzbeih miz song aen da doed okdaeuj, aen’gyaeuj luenzlili, baihlaj aen gyaeujluenz dwg donh ndang dinjded he, baihlaeng aenndang dwg diuzrieng saeqraez, raiz henjndaem, gojyij vangoz. Aenndang song mbiengj maj miz doiq fwed henj mbangmbit he, lumj gyaq vazsiengzgih nei. Baihlaj aenndang miz roek gaiq ga iqet, roek gaiq ga neix gaem ndaet dipva.

Cingq youq gou yawj ndaej maezmwdmwd seiz, biengzbeih lumjbaenz fatyienh gou lo, hu dwk mbin bae lo. Gou gaenjgaenj riengz laeng de, de yaep he mbin gvaq baihswix, yaep he mbin gvaq baihgvaz, yaep he vaiq yaep he menh, aenndang riengjret. Dingq daxmeh gangj, biengzbeih maj song fanh lai aen dafuk, gvaiq mbouj ndaej de cungj fatyienh gou. Biengzbeih mbin daengz naj huz, gaiqrieng baez vangoz, bungq deng naj raemx mbat he, youh riengjret mbin bae lo, najhuz sanq ok baenz gvaengx baenz gvaengx gienluenz.

Biengzbeih, duz ndangmbaeu riengjret neix, de hawj daswyenz dem le haujlai senggei, dwggyaez raixcaix.

(seiq nienzgaep Cangh Swhyi)