Youq romcomz gij rengz guh Mouhungz Meizgvang hwnjbae doengzseiz, swcigih lij guhgvangq le Hozsanh、Dunghloz、Yougyangh daengj diegmeiz geq, caemhcaiq fuzrex fazcanj gij meizgvangq iq digih、si、yienh、se haenx dem. Daengz bi 1975, daengx gih nyuenzmeiz canjlieng dabdaengz 605 fanh dunh. Meizdanq gunghyez ndaej fazcanj, mboujdanh baujcingq le gangdiet yungh meiz, caemhcaiq coicaenh fazcanj le vafeiz gunghyez caeuq suijniz gunghyez dem.

Dang gangdiet gunghyez Guengj- sae miz itdingh goekdaej le, ciuq gij iugouz “bi 1980 nungzyez gihbwnj saedyienh gihgaiva” cunghyangh daezok haenx, Veiz Gozcingh youh dawz gaem nungzyez gihgaiva dangguh hangh yinvu ndeu daez okdaeuj. Bi 1972 ndwen 1, de youq aenhoih Swcigih Gwzveijvei Daihroek Baez Cienzhoih Gozdavei gwnzde naeuz:“Gvaqlaeng, aenvih gunghnungzyez ndaej vaiqriengj fazcanj, nungzyez doiq gihgaiva iugouz couh engqgya gaenj lo. Nungzyez gihgaiva dangh- naeuz riengz mbouj ndaej hwnjbae, vunzhong youh caeu mbouj ndaej okdaeuj, gunghyez aeu yungh vunzhong couh muenxcuk mbouj ndaej. Ndigah, raeuz itdingh aeu gaem ndei hangh hong neix.”

Veiz Gozcingh daj gij saehsaed Guengjsae caeuq gij lohbyaij mbangj guekgya nungzyez fazcanj yamqdin haenx ndaej rox, nungzyez gihgaiva dwg aen fuengyiengq fazcanj nungzyez he. Youq bi 1958, de caeuq Vaznanz Dieggapguh doxyaeng hanghmoeg seiz, couh ciuq leix haenqrengz ceng’aeu, youq Guengjsae hwnjguh Liujcouh Dohlahgihcangj. Bi 1959, mwhde youq Vujhan hai hoih, de daegdaengq cingj boux gunghcwngz- swh Luz Daz daj gunghyinz guh hwnj haenx daengz Vujhan Dungzhuz Binhgvanj, heuh Luz Daz bang Guengjsae sawq cauh dohlahgih, caemhcaiq hawj de daiz yienghbonj Yinghgoz cauh ndeu guh canhgauj. daihngeih, couh miz le gij dohlahgih bonjfaenh gag sawq cauh baenzgoeng haenx. Doeklaeng, de youh ra gij goengdaeuz nungzgihbu, iugouz hawj Guengjsae hwnj di hanghmoeg dohlahgih siujhingz he, doeklaeng ndaej youq Namzningz、Yilinz laebhwnj le Soujfuz Dohlah- gihcangj.

(caengz sat)