50 bi, couh lumj aen giemxdou vang youq gwnz diuzloh seiqvunz raeuz, yamq haeujbae, neix gangj- naeuz dwg caeuq cungnienz ciengx- lwenx gangj caiqraen lo! Mbouj rox mbouj nyinh, gyoengq lan swhgeij cungj heuhguh daxgoeng, byaemhau hix laeglemx benz hwnj gwnz dingjgyaeuj. Hoeng, gou cix roxnyinh cih saw “bouxgeq” caeuq swhgeij lij caengz doxnem geijlai, aenvih ndit banhaemh ca swhgeij lij yienghhaenx gyaeraez. Ndawsim mboujcaengz miz dajsuenq, engq mbouj cingznyienh bae ciepsouh ciuhvunz cungj vangok neix. Mboujlwnh gou ciepsou hix ndei, mbouj ciepsouh hix bah, giemxdou 50 bi gaenq vang youq baihnaj gou. Neix couh dwg swyenz gvilwd, moix boux vunz cungj mboujmiz saekdi banhfap ndoj ndaej gvaq, cijmiz giengiengz dwk hamj gvaqbae, caenndang daejniemh “laux” dwg gijmaz feihdauh cij suenq dwg diuzroen ciuhvunz aeu byaij haenx bw.

Ngamqngamq hamj gvaq giemx- dou 50 bi, nyeux gyaeuj muenghyawj gij ndwenngoenz menhmenh gvaqbae haenx. Yawj gwnz dingjbya swhgeij gaenq benz gvaq、vaij gvaiq doengh diuz dah haenx, gyoengqde cingq cugciemh liz bae gyae lo. Cij lw cungj feihdauh baenz ciuhvunz cimz mbouj gaeuq, lij ce youq ndaw simdaeuz he. Ndawde miz haemz、miz manh、hix miz soemj, engqlai dwg van.

50 bi daeuj, gou gaenq vih ra ndaej aen boiq ciuhvunz baenzgoeng angqvauvau. Caenhguenj doiq boux caencingq guh ndaej baenzgoeng yawj daeuj, neix cijdwg bingzdamh mbouj dij ndaej yawj, mboujmiz yienghlawz deuqnyex. Hoeng, doiq gou daeuj gangj, cix aeu de dangguh gij muzbyauh ciuhvunz, yienh’ok gij gyaciz swhgeij.

50 bi, gou ginglig gvaq aicingz. Seiz doxndiep, dou gijmaz cungj mboujmiz, mboujmiz saekdi ienqhoij, riuhaha buet coh baihnaj. Dangyienz, youq gwnz loh byaij bae baihnaj, ciengzseiz bungz daengz rumz fwn, mboujgvaq, moix baez rumz fwn gvaqbae le, cungj yawjraen sai duzdoengz. Gaem fwngz byaij gvaq geij cib bi, hag roegenq gamz namh, guh baenz aenrongz raeujrug, youh ciengx miz daeg lwg gvai ndeu, caenndang bae cimhyawj gij seizgan vuenyungz gyaeundei ciuhvunz, yiengjsouh aen ranz daiq daeuj hawj vunz simsoeng vaiqvued haenx.

Hamj gvaq giemxdou 50 bi, diuzloh dangguen caeuq goengmingz leihloeg cungj yaek liz gou gyae bae lo, cuengqroengz gij nyapnyuk ndawsim, gveng gij aencingz ienqhoij ndaw saedceij, caiq hix mboujmiz dahoengz hozhaenz, dawz sojmiz nyapnyuk cungj gveng bae seuqcingh. Vuenh lingh cungj fapmoq lix roengzbae, cimz gij feihdauh moq seiqvunz buenq ciuh laeng.

Hamj gvaq giemxdou 50 bi, ciuhvunz lai saek lai yiengh ngamqngamq byaij sat dingz ndeu, dangq youq gwnz diuzloh ciuhvunz bae youzcet, youh vuenh baez ci ndeu. Gou siengj hawj diuzloh bae youzcet iet roengzbae, hawj vaiqvued cungj sij youq gwnz bwnda najbyak, buenx aencung riunyumnyum byaij gvaq moix faen cung, doh gvaq moix miux cung. Gou lij siengj hawj baenz geu baenz geu mok saekcaij, vih gou guhbaenz aen bi’neng ndeu, ciengx- lwenx bi’nengneng, bibuengq youq henz mbwn venj rim souhaeuj, caenhcingz laebdaeb bae sij bingz- ciengz, itcig ciengxlwenx byaij bae coh gizgyae!