Seizcou hohndok yungzheih ndaej bingh, baenzlawz yawhfuengz ne?

1、Haeujsim bauj raeuj. Cunghyih nyinhnaeuz, rumz dwg goekhux bingh, gizsaed, deng nit caeuq binghhohndok caemh mizgven. Daegbied dwg senglwg caeuq bingh naek le deng rumznit ciemq haeuj, hohndok engq yungzheih ndaej bingh. Ndigah, bingzseiz aeu haeujsim bauj raeuj, daegbied dwg giz gyaeujhoq, bingzseiz wng caenhliengh daenj vaqraez, guh hokranz hix aeu yungh raemxraeuj, gaej yungh raemxgyoet.

2、Genhciz yindung. Haujlai vunz hohndok miz vwndiz, yindung mbouj bienh le couh mbouj haengj bae guh yindung lo, saedcaih daeuj gangj, danghnaeuz yindung habngamj, haeujsim gengangh yindung fuengsik, doiq fuengzceih binghhohndok hix daih miz bangcoh, bingzseiz yindung aeu haeujsim hohndok mienx deng sieng, naengh hohndok miz bingh lo, aeu gaenx bae yihyen genjcaz ywbingh.

3、Lai bouj gwn gai. Gai ndaw ndang mbouj gaeuq dwg yaeuhfat baenz binghhohndok aen yenzyinh ndeu, daegbied dwg bouxcungnienz caeuq bouxlaux, bingzseiz aeu haeujsim bouj gwn gai、veizswnghsu、gvangvuzciz、meij、sinh daengj doxgaiq, gwnndoet aeu doxdaengh, lai cungj lai yiengh.

4、Gemjbiz. Bouxvunz bizbwd hix dwg yaeuhfat baenz binghhohndok aen yenzyinh ndeu, ndigah, conhgyah daezsingj naeuz, bouxcungnienz caeuq bouxlaux engq aeu haeujsim yawh- fuengz fatbiz, danghnaeuz biz lai, aeu gibseiz gemjbiz, yienghneix cij ndaej gemjsiuj atlig aen gyaeujhoq.

5、Gibseiz ceihyw bingh- hohndok. Bingzseiz mbouj siujsim hohndok deng niuj sieng roxnaeuz ganjyenj, aeu gibseiz ceihyw, mienxndaej baiz ok mbouj doengz bingzciengz, doengzseiz mwh guh yindung aeu hoh ndei hohndok, gaej byaij daiq nanz roxnaeuz ndwn daiq nanz.