Ho, haeuxcaeuz byaek lai raixcaix! Gou gijmaz hix siengj gwn di, haeuxam gwn geij gaemz le, lw youq ndaw vanj; duzgungq cimz mbat ndeu, mbouj cuengq mbahoz- ceu, vut bae lo; cauj lwggwz、cauj seimajlingzsuz …… gig ndei gwn, hoeng gwn mbouj ndaej geijlai, lw roengzdaeuj cungj deng gou raix roengz ndaw doengj nyapnyaj bae lo.

Gwn sat haeuxcaeuz, gou roengz laeuz bae guhcaemz, yawjraen gyoengqdoih cingq gangj gijmaz. Gou ganjgip buet gvaqbae.

Siujmingz gig daekeiq naeuz: “Ngoenz- neix youq hagdangz gwnngaiz, lauxsae haenh gou aeu haeux ndaw vanj gwn ndaej naed ndeu cungj mbouj lw.”

“10 nyied 16 hauh——Ngoenz Seiqgyaiq Haeuxgwn ngoenzhaenx, lauxsae hawj dou hai banhoih, heuh dou gwn doxgaiq gaej saisaengq bw!”

Daeggiengz daeq gyaeujndoq haenx naeuz:“Gou dingq daxbuz naeuz, aenvih seizneix gyoengqvunz sai haeux daegbied youqgaenj, ndigah ciengx biz duznou lo, duznou sanjlwg ndaej gig ak, haihcawq gig hung, danghnaeuz mbouj yawjnaek aen vwndiz neix, doeklaeng haihcawq baenzlawz yiengh siengj cungj mbouj gamj siengj ha.”

Dingq gyoengqde doiqvah le, gou caiq hix mbouj miz sim guhcaemz lo, gou buet ma ranz, baeghoho doiq daxmeh naeuz: “Daxmeh, mwngz baezlaeng cawj haeux cawj byaek gaej cawj baenz lai lo, mwngz cawj gijmaz, gou couh gwn gijmaz. Gou caiq hix mbouj gwn lw haeux byaek lo.”

Daxmeh doeksaet dwk cam:“Lwg ha, fatseng gijmaz saeh lo?”

Gou aeu gij vah gyoengqdoih gangj haenx gangj hawj daxmeh dingq baez ndeu, lij ciep- dwk naeuz:“Daxmeh, gou aeu gij vah lauxsae youq gwnz goqdangz gangj haenx geiq youq lo, hoeng baez daengz ranz gou couh lumz lo. Mwngz gangj, gou lij dwg lwgnyez ndei lwi?”

Daxmeh umj dawz gou naeuz:“Mwngz dwg lwg ndei, daj seizneix hwnj, daxmeh caeuq mwngz daxcaez mbaet haeuxgwn, mbouj caiq sai haeuxgwn lo.”

“Ndei!” Gou angq dwk riu lo.

(Couh Yifanz)