Aen gyanghaet ngamq doek fwn hung sat he, duzmoed Bwnbwn ngaezngwd naengh youq ndaek rin hung he.

“Vei, duzmoed iq, gyanghaet ndei! Gou dwg duzsaehaexma Coeng- coeng. Gou geij ngoenz neix cungj raen mwngz naengh youq gizneix gag gangj gag naeuz, mwngz gangj gijmaz ha?”

Duzmoed Bwnbwn mwnhsaeng ngiengx gyaeuj hwnjdaeuj, yawj seiqhenz. Youq gwnz gofaex hung henz ndaek rin, de yawjraen duzsaehaexma bizdwd ndeu, cingq daj ndaw geh mbawfaex heuyauyau ndonj aen’gyaeuj okdaeuj, lwgda yubyab gij caencingz rongh lumj raemxraiz nei.

“Vei, Coengcoeng mwngz ndei! Gou miz aen vwndiz he siengj mbouj doeng. Vih maz gou ra daengz gij baujboiq haenx, youq ndaw da gyoengq baengzyoux cix dwg nyapnyaj ne?”

“Mwngz naeuz gij baujboiq mwngz dwg gijmaz ha?”

“Gaiq habfeiz he, mbaw ceij- dangz ndeiyawj he, naed cawbohliz he, lij miz aen heiqci vanzgi cueng bohliz vaih he.” Mwh gangj gij baujboiq neix, lwgda Bwnbwn ronghliklik.

“Hahaha, duzmoed iq, mwngz nyinhnaeuz gij doxgaiq neix doiq sou duzmoed miz yungh lwi?”

“Gou mbouj rox bw, mwh gou iq dingq daxbuz gangj, lajmbwn gijmaz doxgaiq, cungj gag miz gij yunghcawq de!”

“Mwngz caen dwg duzmoed simsoh ndeu! Yienghneix gij doengz- doih mwngz gyaez gijmaz ne?”

Duzmoed Bwnbwn ngaemgyaeuj roengzdaeuj, najnyaenq naeuz: “Gyoengqde gyaez naedhaeux、nyaq- soiq mienhbau、 nyaqsoiq dangauh, lij miz gijgwn wnq dem. Gou gig geizheih, vih maz gou cungj yawj mbouj raen gij doxgaiq gyoengqde gyaez haenx ne?”

“Duzmoed iq, mwngz gaej cungj naengh youq gizneix lo. Gou rox giz dieg he miz haujlai gijgwn ndei gwn, cijaeu mwngz ciuq gij loh gou naeuz mwngz nyi haenx bae ra, couh ra ndaej daengz.” Duzsaehaexma Coengcoeng vix loh hawj duzmoed iq le, couh daenq aenndang bizbwd de raih bae lo.

Duzmoed Bwnbwn ciuq gij sienq- loh saehaexma gangj haenx, nyinh- caen bae ra. Seizhaenx, “gumgum- gum, gumgumgum”, ndaw luegbya cienz daeuj sing byajraez. Duzmoed Bwnbwn ganjgip buet, hoeng ciengz fwn hung he aeu gij geiqhauh saehaexmax biu haenx cungqswi bae seuqsak lo. Duzmoed Bwnbwn loengloh lo. De danqheiq sing he le, fouznaih cienq ndang byaij coh baih ranz de bae.

Youq gwnz loh, duzmoed Bwnbwn yawjraen gaiq habfeiz de gyaez haenx lij dinghdingh ninz youq ndaw gehnywj. De lumj bouxvunz nei menhmenh gvaek mbat he, feiz gvaek dawz lo. De sawqmwh roxnyinh daengz raeujrubrub……Ciepdwk, de yawj- raen naedcaw bohliz, de angqvauvau buet gvaqbae umj dawz naedcaw bohliz. Seizhaenx, raq rumz he bongj gvaqdaeuj, de caeuq naedcaw bohliz doxcaez ringx roengz gumz raemx he bae. Youh “bum” sing ndeu, de raen swhgeij doek youq mbaw ceijdangz de gig sug haenx. Seizhaenx, de yawjraen lingh duzmoed Gvaigvai gingqyienz ninz youq lingh gyaeuj mbawceijdangz!

Yawjraen Bwnbwn, Gvaigvai byaengq hung aenda, gikdoengh dwk naeuz:“Caeklaiq mwngz gaxgonq ra ndaej gij baujboiq haenx, sojmiz gij vunzcaen raeuz caeuq gij haeuxgwn cungj youq ndaw aenheiqci vanzgi! Mboujnex, ciengz fwn hung sawqmwh roengz neix couh yaek dawz gijgwn raeuz aeu daeuj gvaqdoeng haenx, lij miz gij mingh gyoengqmoed raeuz cungj cienzbouh cung bae lo!”

Dingq gij vah neix, duzmoed Bwnbwn doeksaet dwk aj hung aenbak, gikdoengh dwk naeuz:“Laxlawx daxbuz gangj haenx mbouj loek bw, moix yiengh doxgaiq cungj gag miz gij yunghcawq de ha!”

(Vuz Yinz)