Gaeqlwg daegbied gyaez gwn non. Gyoengqde gingciengz youq ndaw nyapnyaj ra non gwn. Miz baez ndeu, gaeqmeh ra ndaej duz non he couh “goekgoekgoek” heuh gyoengq gaeqlwg daeuj gwn. Gyoengq gaeqlwg dingqnyi gaeqmeh heuh, couh caez buet gvaqdaeuj, diuq dwk saet dwk ciengj non gwn. Gaeqmeh aeu duznon sik soiq baen hawj gyoengq gaeqlwg. Lwg gaeqhenj ceiq diuqbeiz, gaeqmeh lij caengz sik sat couh sien daj ndaw bak gaeqmeh ciengj aeu gaiq hung he, dot aeu le couh buetdeuz lo. Miz geij duz gaeqlwg yawjraen le, couh buet gvaqbae gyaep lwg gaeqhenj. Lwg gaeqhau he buet ndaej ceiq vaiq, baez dot couh dot dawz gaiq nohnon ndaw bak lwg gaeqhenj lo. Lwg gaeqhenj gizlawz haengj soeng bak. Song duz gaeqlwg lumj bengcag nei, mwngz ceng gou dued. Doeklaeng, nohnon lij dwg deng lwg gaeqhenj dued bae lo. Gou yawj dwk lwg gaeqhenj riu lo. Gaeqlwg geijlai diuqbeiz dwggyaez ha!

(seiq nienzgaep Couh Yij)