Bi 1969 ndwen 2, baez hoih giva daengx guek daezok, ceng’aeu youq sam bi daengz haj bi ndawde, gaijbienq gij canggvang meiz baihbaek yinh coh baihnamz. Meizdan gunghyezbu iugouz Guengjsae yungh meiz gihbwnj aeu baengh bonjfaenh gag ra. Gij giyez Guengjsae, geij bi daeuj ciengzciengz aenvih meizdanq baihbaek mbouj ciuqseiz yinh daeuj deng dingzcanj. Najdoiq cungj cingzgvang neix, Veiz Gozcingh doiq gij goengdaeuz faenguenj ginghci swcigih haenx naeuz: “Seizneix raeuz saedcaih mbouj miz gijwnq banhfap lo, cij ndaej baengh Guengjsae raeuz, baengh bonjfaenh gag guh, ra lai diuz roenloh daeuj gaijgez yungh meiz aen vwndiz neix.” Anh Bingzswngh caeuq Cinz Yinggih cungj nyinhnaeuz, ciumeiz Guengjsae baengh rogsengj, mbouj baengh ndaej nanz, itdingh aeu cizgiz cimhra caeuq haifat gij swhyenz ciumeiz gih raeuz.

Daj bi 1970 hwnj, daengx gih cujciz le 50 lai aen daizcongih、600 lai boux gunghcwngz gisuz yinzyenz bae guh baez veican damqra diciz ndeu, lienzdaemh fatyienh le buek diegmeiz ndaej gung haivat he. Lij fatdoengh geij cib aen cangj cauh gihgi mizgven gihgai、hong meizdanq dem, cauh- baenz 12 fanh daiz (dauq) sezbei baenzdauq gvangqcingj cunghsiuj- hingz caeuq boiqgienh hawj meiz- gvangq, gihbwnj baujcwng le gij sihyau gunghyez swnghcanj meiz- gvangq. Doengzseiz, lij hwnj le geij diuz dietloh yinh meiz ciensienq caeuq gyaqhwnj 150 goengleix sienqloh yinh dienh gauhyaz 11 fanh fuk haenx, daihdaih daezsang le gij naengzlig swnghcanj meizdanq.

Ciuq diciz damq ndaej rox, gij meizfouzhoenz Guengjsae cujyau faenbouh youq Vanzgyangh Hungz- sanh caeuq Lozcwngz ranghdieg neix. Gveicouh Sengj Moulanz Yen depgaenh gih raeuz Vanzgyangh, caemh dwg aen dieg ok meizfouzhoenz ndeu. Miz vunz genyi, caijyungh doxleih doxbouj cungj fuengfap neix, ciq rengz Gveicouh Moulanz daeuj haivat meizfouzhoenz, raeuz ne bouj hawj de haeuxgwn caeuq fusizbinj. Veiz Gozcingh caeuq gij goengdaeuz swcigih wnq doengzeiq le aen genyi neix, bae caeuq gij goengdaeuz Gveicouh doxyaeng, Gveicouh caemh doengzeiq lo. Yienghneix, Guengjsae riengzdwk guh baenz Lozcwngz Meizgvang le, youh lienzdaemh guh baenz Hungzmou Meizgvang. Seiz- haenx dungyenz daengx gih 18 fanh minzgoeng caeuq daihbuek bouxbing bouxcijveih gaijfangginh youq gizneix guh aen veican haivat meizfouzhoenz, haidoeng le diuz dietloh hai bae coh Moulanz ndeu. Ginggvaq geij bi roengzrengz, youq aen dieggoek moq meizfouzhoenz neix guh le 6 doiq gvangqcingj, swnghcanj naengzlig dabdaengz 99 fanh dunh.

(caengz sat)