Lajmbanj moix faen cung cungj daiq hawj mwngz mbouj doxdoengz gamjsouh! Mwngz saenq ma? Doxgaiq gig swhyienz, caemhcaiq rox gaijbienq seiqvunz mwngz dem.

Haetromh, heuh mwngz sing daih’it ndiusingj mbouj dwg nauh- cung、soujgih roxnaeuz sing ci yiengj gwnz loh. Mwngz siengj dwg maz ne? Haha! Dangyienz dwg gaeqboux heuh mbwn rongh lo! Neix mwngz wnggai siengj ndaej daengz ba. Haetromh mok mbang hainduj sanqfat heiqhom hoenz cawj ngaiz, daengngoenz hoengzfwg menhmenh daj gwnz byai gomeg riu dwk loh naj okdaeuj; mbouj rox dwg byawz nyex duz mahenj sohsad haenx hoznyaek, dingq: De cingq raeuq dwk ne! Sing “ bangbang ” gai daeuhfouh daj geiqndaej couh itcig roq daengz seizneix. W! Wnggai suenq dwg doengh aen gaeuqgeq lo, hoeng, moix baez dingq daengz haetromh sing seuqsak “bangbang”lij dwg baenzneix caenciet, ndaw geiqndaej de cungj dwg boux daih’it hawj mwngz vuenheij. Mwh lij iq, lajmbanj mbouj miz maz ndei gwn, haetromh, gyaq moegci iq he, daeuhfouh ndaw doengjdiet venj youq song henz moegci mauh ok heiqndat daeuhfouh, cungj dwg baenzneix hawj vunz ngah gwn. Buenz daeuhfouh ndeu coq di gyu, youh dwk di youzhom roxnaeuz gya di coeng, caiq gwn vanj cukhaeuxyangz meh caenfwngz guh dem, caen gamjdaengz gwnzbiengz caiq hix mbouj miz gijmaz beij gijneix engq vuenyungz lo !

Daengz mok sanq bae gag louz benq mbwnlamz ndeu seiz, mbouj miz byawz beij roeggacak engq angq lo. Gyoengqde soengz youq nga ceiq sang swenj dwk. Gyoengq bouxlaux youq ndaw naz guhhong baenzciuh haenx ceiq maij dingq roeggacak swenj lo, mbouj dwg aenvih gijwnq, roeggacak baez heuh, gyoengqde couh ndaej maeuq youq gokciengz dak ndit lo, ngoenzneix mbwn itdingh gvengq! Yienghneix, gvaq mbouj geij nanz, gyoengq bouxlaux couh geb daengq okdaeuj, dawz geizciengh,“hoenx- ciengq” hwnjdaeuj. Naengh youq geizbuenz baihnaj caen miz cungj ganjgyoz lumj daiqlingx bak fanh bingdoih nei, mbangjseiz lij aenvih saek yamq geiz siengj hoizgeiz, lingh boux mbouj hawj hoiz couh doxceng geij coenz. Mboujgvaq, gaej yungh yousim, gyoengqde mbouj rox caen hoenx hwnjdaeuj. Haha. Dwkgeiz baeg le couh yietnaiq gangjgoj yaep ndeu, gaej yawj gyoengqde youq ndaw naz guhhong baenzciuh, sinhvwnz、guek- gya daihsaeh, hix dwg cawjdaez gyoengqde gangj. Sazdazmuj gig camj、Bwnjlahdwngh rwixrad、Meijgoz cungjdungj ceiq fouzlaih. Duzma maeuq youq henz ndang bouxcawj, ninz baeg le couh ngauz diuzrieng baenq song hop, beij bouxcawj lij cwxcaih.

Duzvaiz laux lij heuh “momo”! De hozhat? Lauheiq dwg dungxiek lo! Mboujnex couh dwg duzlwg de buet bae gyae lo ……