Mbauq:

Sau Nazmax eu fwen,

Sing gom rwenz youh gok;

Rwenz gvaq mbanj gvaq gyok,

Coenzcoenz dot sim go.

Sau:

Va hom rwi daeuj ciuz,

Fwen ndei iu vunz danq;

Raen go nuengx sim’angq,

Vangh cam mbauq mbanjlawz?

Mbauq:

Nuengxsau vunz caihhangz,

Go gag gyangz nanz beij;

Mbanj go saedcaih yaez,

Nanz lwnh caez nuengxsau.

Sau:

Roeb raen caen najseng,

Mbanjnden caengz raen gvaq;

Mbanjgwnz naeuz mbanjlaj,

Mbanjfax naeuz gyokgwnz?

Mbauq:

Mbanj go gungz youh ndoq,

Nuengx doq gaej yungh caz;

Naeuz miz sim gap gvaq,

Couh gaq giuz caux roen.

Sau:

Beix gaej gangj gvaenxgvax,

Hawj nuengx sax baenz hoj;

Mbanj sou dwg maz coh?

Cigsoh lwnh nuengx nyi.

Mbauq:

Lwnh nuengx mwngz cix mbwq,

Daemz hwq(hawq) naz dek hau;

Ndaw ranz gungzlauqlauq,

Lwgsau lau daeuj cimh.

Sau:

Beix caenh gangj doxhaep,

Ngoenz haepdou maenhcat;

Nuengx byaijroen hozhat,

Bak siengj cat gaemz raemx.

Mbauq:

Aendou mbouj doengz vunz,

Mbwnbumz naz caiq rengx;

Gwn hoj buhvaq rengq,

Yienghyiengh mbouj beij mwngz.

Sau:

Beix gangj daemz dek hau,

Lau seih mbanj Daemzrengx?

Mwngz fwen danq baenz lengj,

Nanz siengj rox fueng lawz.

Mbauq:

Daemzrengx youq mbanj gwnz,

Gou dwg vunz mbanjlaj;

Nuengx bae haw Siggaq,

Lij byaij gvaq bakdou.

Sau:

Siggaq sam nga loh,

Bae coh diuz lawz daengz?

Din bok geij luep naeng,

Lau caengz raen ranz beix.

Mbauq:

Nuengx cam baenz cikgig,

Ciuqcig lwnh hawj mwngz;

Daemzrengx youq mbanj gwnz,

Gou dwg vunz Nazrengx.

Sau:

Laxlawz mbauq Nazrengx,

Fwen mengx vunz youh gvai;

Ndaej caeuq mwngz bingzbaiz,

Mbouj gwn ngaiz goj imq.

Mbauq:

Fwen gou lumj go’nyangj,

Nuengx dauq gangj naeuz gvai;

Nanz bingq mwngz dungxcaiz,

Guh baenz baiz baenz beij.

Caez:

Ndaej doxcaeuq eu fwen,

Raeuz simvuen fouzbeij;

Caemh ranz caemh dajraeq,

Gwn byaekvaeh caemh diemz.