Youq mwh gyahung Liujgangh, swcigih doengzseiz lij hwnjguh caeuq dauqguh le buek ganghdezcangj iq ndeu. Daengz bi 1975, daengx gih bi guh ok faz 12.8 fanh dunh, fazndip 23.2 fanh dunh, ganghcaiz 10.8 fanh dunh. Gijneix doiq Guengjsae fazcanj gunghyez gihgai caeuq doidoengh nungzyez gihgaiva, miz gij cozyung cibfaen youqgaenj. Doengz- seiz, swcigih yungh gij gangdiet doyawz haenx caeuq gij sengjsi wnq doxvuenh gij doxgaiq raeuz gip aeu haenx, doiq gensez Guengjsae caemh mizleih.

Mwh Veiz Gozcingh lizhai Guengjsae, Liujgangh gaenq baenz aen giyez doxgapguh cunghhingz ndeu, miz gij sezsih byagvangq、lienhdiet、lienhfaz、lienhciu、daenz- gang caeuq mizgven dajcoih、dajyinh nem vaqniemh bonjfaenh haenx. De itcig gvansim gensez Liujgangh, cigdaengz de yaek gvaqseiq song bi gaxgonq, couhdwg bi 1987 ndwen 8 ngoenz 5, de lij ciepsouh gij cingjgouz Liujgangh, raiz hwnj “Fazcanj Gangh- dez Gunghyez, Gensez Seveicuiyi” diuz daezswz neix hawj Liujgangh, caemhcaiq doiq gij dungzci Liuj- gangh naeuz:“Liujgangh byaij daengz ngoenzneix mbouj yungzheih, Guengjsae ngamq miz aencangj dog, cingj bang lwnh gyoengq goengdaeuz caeuq vunzhong Liujgangh, aeu gensez Liujgangh engq ndei bae, dawz swnghcanj guh ndei, dawz gwndaenj guh ndei.” Seizneix raeuz ndaej nai Veiz Gozcingh naeuz, Liujgangh ginggvaq lai bi gaijgwz hailangh, youh miz ndaej fazcanj moq lo, faz、diet、caiz bi swnghcanj naengzlig cungj ndaej mauhgvaq bak fanh dunh, canjbinj gai daengz daengx guek 20 lai aen sengj、si、swcigih, mizmbangj lij gai bae daengz Yizbwnj、Feihlizbinh、Daigoz、Munggyahlah、Sinhgyahboh daengj guekgya dem.

Fazcanj gangdiet, aeu miz meizdanq. Guengjsae dwg gizdieg meiz noix ndeu. 50 nienzdaih geizlaeng, Veiz Gozcingh cingj gvaq boux diciz bucangj、boux canghhag diciz okmingz Lij Swgvangh daeuj Guengjsae, bang faensik、buenqduenh gij canggvang diciz Guengjsae. De caemh caenndang bae daengz daih- itsienq guh diucaz, bi 1958 seizcin, de dingqgangj Liujcwngz fatyienh daenz miz meiz, de sim gig angq, caenndang daiqlingx mizgven vunz bae ndonj yiuzmeiz gizde. Gij yiuzmeiz iq neix, cungj dwg cungq- vunz gizneix ngamq gag guh hwnj- daeuj, haujlai giz aeu ruenz byaij, ndaw yiuz youh oem youh hwngq, de caeuq daengxcungq doengzcaez ruenz, baez ok congh daengxndang cungj youh aeuj youh ndaem. Gij dungzci bonjdieg gienq de yietnaiq, de naeuz mbouj, dauqfanj youh cam gyawz lij miz yiuzmeiz, caiq bae yawjyawj dem. De youq Liujcwngz gungh baenq sam ngoenz. Ginggvaq gij bumwnz mizgven diciz、meizgvangq haenx caez roengzrengz, yienznaeuz Guengjsae ra ndaej mbangj diegmeiz miz itdingh gyaciz haivat, hoeng cix itcig ra mbouj deng gij diegmeiz hung naengz haivat haenx, daegbied dwg ra mbouj deng gij meizyenzdenz mbouj miz hoenz naengz gunghawj lienhciu haenx. Gij ciumeiz Guengjsae soj yungh, ciengzgeiz gvaqdaeuj cujyau baengh diegrog gunghawj.

(caengz sat)