Seizhaenx, dwg mwh yiemzdaj ceiq youqgaenj, gak danhvei lingjdauj mbouj miz bouxlawz gamj oetngaenz aeungaenz.

Ranz Vangz lauxsae youq rungh- gungx, ranz de cij miz song duz yiengzgeq caeuq duz gaeqmeh geq he.

Vangz lauxsae daigo gaenq ndaej 25 bi lo, de laebdaeb camgya 5 baez daigo cienjcingq gaujsi, moix baez gaujsi gij cingzcik de cungj baiz youq baihnaj, danhseih, de cungj fouz- yienz cienj ndaej cingqsik lauxsae.

Miz geij baez, de dingqnyi bouxwnq youq raeblaeng ngeixlwnh, danghnaeuz mwngz gauj ndaej hwnjsienq le, itdingh aeu byaij “doulaeng” cij ndaej. Couh yiengh- neix, de dauqma ranz, ninz youq gwnz mbonq siengj le buenq hwnz: Ndaw ranz gou sam daih gaxgonq wnggai miz caencik dangdaeuz ba! Nyoeb bae nyoeb dauq, doeklaeng de gaem ndaej gofiengz he. Yen Minzcwnggiz Vangz fugizcangj couhdwg boux caencik sam daih gaxgonq de. Couh yienghneix, de gietdingh byaij diuz roen neix.

Bi’gvaq nienzdaej, de dingqnyi naeuz miz daigo cienjcingq gaujsi, de sikhaek gaj duz yiengzdaeg geq bae, daiq haj roek gaen nohyiengz caeuq 10 gaen laeujgaeuq, gig angq dwk ganj haeuj ndaw minzcwnggiz bae lo.

Baezneix Vangz fugizcangj ciep aeu gij doxgaiq neix fwngz cungj unq liux, gwn laeuj noh ndei cungj nywnx dwk haex bongh siq caez.

Hoeng, nienzdaej gvaq le goj mbouj miz daigo lauxsae gaujsi. Vangz lauxsae beg caj baez he lo.

Seizgan gvaq ndaej gig vaiq. Daengz bineix, youh miz aen siusik ndei ndeu cienz daeuj, baezneix caen miz daigo lauxsae gaujsi cienjcingq lo. Vangz lauxsae couh dawz duzyiengz meh geq gaj bae, youh lumj baezgonq nei, daeuj daengz ndaw minzcwnggiz ra Vangz fugizcangj, song boux gwn laeuj fiz daengz mwhlawz cungj mbouj rox.

Gaujsi gvaq le, gij cingzcik Vangz lauxsae cij baiz youq daih 36 mingz, ciuq 1:2 mbouj ndaej hwnj- sienq.

Vangz lauxsae gietdingh riuj duz gaeqmeh geq doj neix, byaij haeuj yenveij suzsegih, daeuj daengz ranz Vangz fugizcangj. Baezneix dwg banringz, song de cij gwn di laeujbizciuj he. Gwn sat le, Vangz fugizcangj couh heuh Vangz lauxsae riuj gaeq dauqbae, de naeuz, cungj dwg caencik, mbouj yungh daiq hekheiq lai. Vangz fugizcangj lienz doi daiq nyoengx Vangz lauxsae ok dou bae lo.

Vangz lauxsae caiq sam naeuz dawz gaeq louz roengzdaeuj, gij naj Vangz fugizcangj lumj najmax baenzneix raez, gig mbouj angq lo. Vangz lauxsae cix naj rwd nding rwd heu, cij ndei youh riuj gaeq dauqbae lo.

Gvaqlaeng, Vangz lauxsae caz rox, yienzlaiz, gij singq Vangz de dwg gungdenz Vangz, gij singq Vangz fugizcangj dwg sam vengz Vangz, cuzbuj gyoengqde caemh mbouj doxdoengz.