Seizcou dauqdaej seizlawz baenz gwn bouj、baenzlawz gwn bouj cij habngamj ne? Itbuen daeuj gangj, yaek gwn bouj gaxgonq ceiq ndei miz aen gocwngz ndeu daeuj diuzleix aendungx, hawj aenndang swhgeij hab’wngq le caiq hainduj gwn bouj. Guek raeuz baihnamz dingzlai digih haeuj laebcou le duenh seizgan gig raez ndeu mbwn lij haemq ndat, hoengheiq mbaeqdoh hix haemq daih. Youq cungj cingzgvang neix lajde mbouj hab gwn bouj, cix wng lai gwn di duhheu、duhbap、haeuxlidlu、mbawngaeux daengj doxgaiq, hawj heiqcaep heiqndat daj ndaw nyouh baiz okdaeuj, coi goengnaengz aendungx hoizfuk dauq ndei. Cunghyih nyinhnaeuz, gwn cuk ndaej huz dungx、bouj mamx、nyinh sauj, ndigah, boux aendungx hawnyieg youqgaenj, aeu youq canghyw dazyinx lajde gwn di yw ndeu daeuj cangq mamx、ik heiq、huz dungx, aeu daeuj coicaenh goengnaengz aendungx hoizfuk dauq ndei.

Doeklaeng aeu giengzdiuh dwg, bouxlaux caeuq boux baenz menhsingq veiyenz、cangzyenz haenx, aenvih goengnaengz aendungx gemjnyieg, haeuj laebcou le gaej doq sikhaek gwn bouj, mboujnex rox aenvih “haw mbouj souh ndaej bouj” cix yinxhwnj baenz mbouj siengj gwn doxgaiq caeuq baenz dungxraeng daengj bingh.