Raemxrij miz souj go he, ciengxlwenx cungj ciengq mbouj sat.

Diuz rij vaivued he ciengq go dwk, mbouj baen hwnzngoenz lae baenaj, ndaw luegbya cungj mbouj dingz hap gij sing go de. Daengngoenz okdaeuj lo, naj riunyumj riu coh de. Youq aenda sawrongh de, gwnzbiengz sojmiz doxgaiq cungj lumj de ityiengh singjsien、vaiqvued. De mbouj dingz caeuq gij doxgaiq de nyangz daengz haenx dongx naeuz: “Mwngz ndei! Mwngz ndei!”

Raemxrij itmienh lae, itmienh guhcaemz. De yaep he bek gij rin gak saek gak yiengh henz hamq, yaep he lumh aen’gyaeuj go’nywj ngamq daj ndaw namhsa loh okdaeuj haenx. De yaep he sawj gij mbawfaex biufouz youq naj raemx haenx baenq bae baenq dauq, yaep he gaeugaeu aenndang duzrug gyaep de haenx. Mbawfaex mbouj lau saekdi, menhmenh baenq song gien le, youh biu coh baihnaj. Duzrug cix miz di lau gaeu, ganjvaiq youz coh henz hamq. Duzrug maj ok ga haenx lij hag duzgoep daxmeh vuengmuengz daeb gaiqga de.

Raemxrij riu dwk buet coh baihnaj. Miz ndaek rin hungz he lanz loh de, de couh yaengyaeng yat song mbat, yunghrengz baez bongh couh bongh gvaqbae lo. Gijmaz hix lanz mbouj youq de lae baenaj. De yungh aensing ndei dingq ciengq go dwk, ndaw luegbya gij sing mbouj dingz hap haenx hix gig ndei dingq, hawj vunz dingq le couh lumz naetnaiq caeuq nyapnyuk.

(Yenz Vwnzcingj)