Ranz gou ciengx miz duz meuzraiz ndeu, duz meuzraiz neix vuedbued dwggyaez, gou ceiq maij caeuq de guhcaemz lo.

Gou baez ma daengz ranz, duz meuzraiz neix couh buet gvaqdaeuj biujyienj gij heiq caixhangz de—— yaep he youq henz din gou ringx bae ringx dauq, yaep he dakmai seiq din daengj hwnj cang dai, yaep he mbouj dingz baenqgien. Gizsaed gou rox, de couhdwg siengj heuh gou bang de gaeu ndang. Gou daegdaengq mbouj swt de, de couh cien fueng bak geiq daeuj gwedgalaux gou, gij yienghceij haenx dwggyaez raixcaix.

Gou raen duz meuzraiz neix ceiq maij gij doxgaiq “doengh”, couh ra gaiq faex cik lai raez he daeuj, youq baihgwnz cug gaiqbaengz, guh baenz diuzbien he. Cijaeu gou vad diuzbien, duzmeuz couh cingsaenz gvaekgvaek lo, aenda daengx dwk luenzlili, cim dwk gaiqbaengz, ngaem aenndang roengzdaeuj, cunjbei bae gung aeu gaiqbaengz. Caj ra daengz seizgei le, duzmeuz couh sikhaek lumj fagnaq bongh okbae nei coemj coh gaiq- baengz. De baez coemj aeu gaiqbaengz, gou couh sikhaek riuj gaiqbaengz hwnj sang, bik dwk de ndwn soh aenndang. Doeklaeng gou yied riuj yied sang, duzmeuz cij ndaej diuq hwnjdaeuj va aeu gaiqbaengz, va mbouj daengz, de couh gip dwk mbouj dingz heuh myaumyau. Gou yawj duzmeuz yaek hozndat lo, couh hawj de va dawz baez ndeu. Miz seiz de sawq geij baez le cungj va mbouj daengz, couh hixnaengz mbouj va lo, gaij gyaep diuzriengz swhgeij baenq- lulu.

Haha, daeuq duzmeuz mizyinx lai lo!

(seiq nienzgaep Lij Swnh)