gojsaeh iq

Doenghbaez miz boux yenzvaih ndeu, de miz sam boux lwgmbwk, dah’it、dahngeih cungj haq hawj bouxvunz miz ngaenz lo. Hoeng dahsam cij haq hawj bouxhoj daeglei. Daeglei gig gvai, swhgeij mbouj haengj yungh- rengz guhhong, cungj dauqbae ranz goengda aeu ngaenz.

Miz ngoenz he, Daeglei youh bae ranz goengda aeu ngaenz. Goengda mbouj siengj hawj, couh naeuz:“Danghnaeuz mwngz rox hwnj gwnzmbwn bae aeu bak roeg dauqdaeuj, gou couh hawj mwngz ngaenz.” Daeglei couh cauj haeux hom, coq roengz laeuj bae ngauz sam ngoenz sam hwnz, dak sauj le couh saj youq gwnznamh. Baezneix couh miz haujlai roeg daeuj dot haeux gwn, gvaq yaep he gyoengq roeg cungj fiz lo, ninz youq gwnznamh. Daeglei gip duzroeg ndeu dauqma ranz, de daet bakroeg roengzdaeuj dawz bae hawj goengda yawj. Goengda yawj le cam:“ Gou heuh mwngz bae gwnzmbwn aeu bak roeg dauqdaeuj, mwngz guhmaz dawz aenbak duzroeg ma?” Daeglei naeuz: “Mwngz mbouj dwg naeuz hawj gou bae aeu bakroeg?” Goengda cijnaengz nyinhsaw lo, caemh hawj ngaenz hawj de lo.

Doeklaeng Daeglei yawjraen ranz bouxwnq miz vaiz cae naz, de rox ranz goengda miz vaiz lai, couh hwnj ranz goengda bae lo. Daeglei bae daengz ranz goengda, dingjlingz dingqnyi goengda doiq boux hen vaiz naeuz:“Mwngz yaek hen ndei lo, gou miz 99 duz vaiz, daengz haemh dauqma duz he cungj mbouj ndaej siuj!” Daeglei doq buet bae ranznden ciq duzvaiz he daeuj, swnh boux hen vaiz caeuq goengda mbouj haeujsim, couh cuengq duzvaiz ciq haenx haeuj rienghvaiz goengda bae.

Doeklaeng Daeglei youh bae ranz goengda naeuz de youh siengj aeu ngaenz. Goengda aenvih saeh baez- gonq hozhwnj Daeglei, couh naeuz:“Daeglei, mwngz cai ndaw riengh gou miz geijlai duz vaiz?” Daeglei dap naeuz:“Bak duz.” Goengda riuhaha naeuz:“Mbouj dwg mbouj dwg!” Daeglei naeuz:“Goengda mwngz gangj gou naeuz mbouj deng, mwngz gangj miz geijlai duz?” Goengda naeuz: “Gou haengjdingh rox vaiz gou miz geijlai duz!”Daeghlei naeuz:“Yiengh- neix raeuz dajdoj, danghnaeuz gou hingz, mwng couh hawj duzvaiz he hawj gou; danghnaeuz mwngz hingz, gou couh hawj mwngz duz he.” Goengda mbouj rox dwg hongx Daeglei, nyinhnaeuz swhgeij itdingh hingz, couh doengzeiq lo.

Yienghneix song boux de caemhdoih daeuj daengz rienghvaiz, goengda geq bae geq dauq, caen miz bak duz vaiz dahraix. De simniemh: Yenzlaiz gou miz 99 duz, seizneix lai okdaeuj duz ndeu, danghnaeuz gou saw lo, hawj Daeglei duz ndeu, gou hix mbouj goem. Yienghneix goengda couh hawj Daeglei duz vaiz he.

Daengz ngoenz daihngeih, goengda lij mbouj simlaemx, youh bae geq vaiz, cij raen ngamq miz 98 duz. Yenzlaiz daengz gyanghwnz Daeglei caegcaeg hai bakdou rienghvaiz goengda, duzvaiz gyangngoenz de ciq ranznden ma haenx gag roxroen dauqbae ranznden lo. Ndigah goengda cijmiz 98 duz vaiz. Goengda rox dwg Daeglei loengh saj bajheiq, gig hoznyaek, doq bingh youq gwnz congz. Daeglei mbouj gamj bae ranz goengda lo, cijnaengz gaenx guhhong ciengx ranz.

Miz ngoenz he, Daeglei ndaem naz baeg lo, couh daengz henzdah gop raemx gwn, byawz rox, aen mauhdiemx de doek roengz ndaw dah bae. Daeghlei ganjgip bae vez aeu, aenvih ndwn mbouj maenh gvad roengz ndaw dah bae. Daeglei rox youzraemx, hoeng song cik din deng golabfangz heux maenh le, mbouj miz rengz youz dauq henz dah. Doeklaeng Daeglei couh deng mbaetdai lo.

Doeklaeng vunz gizneix cungj naeuz Daeglei vunz gvai lai, lungzvuengz yawj mbouj gvenq de couh byaeu de bae lo.

(Vangz Genh hoiz)