Bi 1970 ndwen 5, swcigih cingq- sik laebbaenz aen cijveihbu daveican hwnjguh goekdaej Liujgangh. Veiz Gozcingh caenndang bae daengz Liujgangh, doiq Liujgangh guh daveican guh liux cijsi, iugouz gij danvih caeuq vunzlai camgya daveican haenx, caezsim caezrengz, haenqrengz guhhong, caenhvaiq dawz Liujgangh gauj hwnjbae. Seizde, gij danvih cigciep camgya veican haenx miz Guengjsae Yejginh Gensez Gunghswh、Gihgen Haj Gunghswh、Gih Gihgai Gunghswh、Gih Vuzswh Sezbei Gunghswh、Gih Cunggunghyez Gunghswh、Liujcouh Gunghcwngz Gihgaicangj、Liujcouh Gihgaicangj、Liujcouh Dohlahgihcangj daengj 31 aen danvih, lij miz Namzningz Yejgvangcangj、Liujcouh Gunghyaz- gihcangj daengjdaengj ndaw gih rog gih 32 aen danvih dem, bae guh sojmiz gij doxgaiq sezbei veican aeu yungh haenx. Gij ganbu、vunzgoeng、lauxsae caeuq hagseng Liujcouh Si dangjcwng gihgvanh、gunghcangj、hagdangz dox- lwnz bae daengz gij dieghong yivu guhhong, hawj yamqdin mbegvangq Liujgangh guh ndaej engq vaiq.

Veiz Gozcingh doiq hwnjguh Liujgangh, daj hanghmoeg daengz hwnjguh boiqdauq, cungj naemj daengz caez liux. De caenndang sij saenq hawj Yizgihbu Lij Suijcingh bucangj, cingjgouz de anbaiz cauh 10 dauq sezbei lienhgang、lienhciu caeuq daenzgang sezbei hawj Liujgangh. Ndaej Yizgihbu bangrengz le, de youh ceijdingh Yinz Gwnghgingh guh boux cujcangj coihuq, fucwz caeuq gij bumwnz sezgi、gunghcangj caeuq mizgven danvih Yizgihbu guh lienzhaeh, baujcwng 10 dauq sezbei neix ndaej ciuqseiz yinh daeuj daengz. Seizhaenx, cunghyangh hawj Guengjsae yungh vaivei bi cij ngamq miz 100 lai fanh Meijyenz, miz vunz naeuz, dwg mbouj dwg yungh mbangj vaivei bae cawx di yw he, Veiz Gozcingh mbouj doengzeiq. De naeuz: “Gij vaivei mizhanh neix doiq Guengjsae daeuj gangj gig dijbauj, raeuz yaek aeu yungh youq giz gaenj yungh.” Liujgangh aeu yungh vaivei daj Yizbwnj cawx gij gihgi ma guh heiqyangj, de baecinj hawj gyoengqde yungh gij vaivei neix. Liujgangh cangj hung, gunnanz lai, doiq Guengjsae fazcanj ginghci gig youqgaenj, de ok le haujlai lwedhanh hawj aen cangj neix, lai baez bae Liujgangh liujgaij cingzgvang, bang gaijgez gannanz. Youq Liujgangh swnghcanj guh mbouj hwnjbae seiz, de caenndang doigawj gij goengdaeuz maenhndei bae gizde bang gaijgez nanzdaez, dawz gunghcoz gaem hwnjbae.(caengz sat)