Gaxgonq, miz song boux vunz dungx gig iek, ndaej boux laux ndeu soengq hawj doxgaiq: Gaenj faexset ndeu caeuq gez byahung rim he. Boux ndeu aeu gez byahung rim, lingh vunz aeu gaenj faexset, leuxle song boux de couh gak byaij gag roen lo. Bouxvunz ndaej bya youq gizde couh coemh fwnzsauj cawj bya gwnguk, yaepyet, de couh gwn bya caeuq dang seuqsat, mbouj geij nanz, de couh iek dai youq henz aen gez byouq haenx lo. Boux vunz aeu gaenj faexset haenx nyaenx dwk dungx iek, baez yamq baez yamq gig gannanz dwk byaij bae coh henzhaij, hoeng, daengz de yawjraen giz mbouj gyae raemxhaij heuswd seiz, gaenq baeg dwk mbouj miz saek di rengz, doeklaeng de hix gikheiq dwk dai bae lo.

Youh miz song boux vunz dungx iek, song boux de ityiengh ndaej boux laux ndeu soengq hawj gaenj faexset ndeu caeuq gez byahung rim he. Cijdwg song boux neix mbouj gak byaij gag roen, dauqfanj doxyaeng caemhdoih bae ra haij, song de moix baez cij cawj gwn duz bya dog, ginggvaq bin bya dangh dah, song de daeuj daengz henzhaij lo, doeklaeng, song boux neix couh hainduj dwkbya gvaq ngoenz, gvaq geij bi le, song de gak vunz hwnj ndaej aen ranz ndeu, gak boux gag miz ranz、miz lwg, gag guh ruz, ndwenngoenz gvaq ndaej gig vuenyungz.

Boux vunz ndeu dan goq leih’ik dangnaj, cijnaengz ndaej daengz vuenangq yaepyet; boux vunz ndeu muzbyauh sang gyae, hoeng, hix yaek aeu bae najdoiq swnghhoz yienhsaed.