Ngoenzhaenx gou caeuq daxboh daxmeh bae cauhsi cawx doxgaiq. Daxmeh daeznaeuz youz gou daeuj dang “caizcwng gvanj- lijyenz”, couh hawj gou 100 maenz ngaenz, youz gou daeuj anbaiz cawx doxgaiq. Gou angq lai lo. 100 maenz ngaenz doiq boux lwgnyez daeuj gangj caen dwg gig lai lo, gou ndaej siengj banhfap mbaet di roengzdaeuj guh cienzlingzyungh.

Gou daiq daxboh caeuq daxmeh byaij haeuj ndaw cauhsi. Daxboh riuj aenlamz, mbouj dingz gip doxgaiq roengz aenlamz bae. Yi, daxboh baenzlawz lumj lwgnyez nei, yawjraen gijmaz cungj siengj aeu! Baihhaenx daxmeh yawjyawj gizneix, youh yawjyawj gizhaenx, lumj siengj gijmaz nei genj doxgaiq, yienz- haeuh genj aeu geij yiengh gijgwn de gyaez gwn haenx. Gou ne, gizlawz gamj genj doxgaiq ha, yawj gij doxgaiq ndaw fwngz bohmeh, 100 maenz youq ndaw fwngz gou couh yaek mbouj raen lo!

Daxboh riuj lamz doxgaiq naeuz:“Dauhdauh, daeuj gyau cienz.”Gou miz di veiznanz naeuz: “Daxboh, mwngz dawz ok di, gaej cawx baenz lai, ndaej lwi?” Daxboh miz di saetmuengh, naeuz: “Gijneix cungj dwg gij doxgaiq gou gyaez haenx ha, mwngz couh hawj gou cawx ba!” Seizhaenx, gou lumj yawjraen gij yiengh doenghbaez gou gouz daxboh cawx nei.

Dang “caizcwng gvanjlij- yenz” caen mbouj yungzheih ha, gawq aeu hableix bae yungh cienz, youh aeu laengz daihgya mbouj miz hanhhaed bae yungh cienz, dwg gienh saeh haemq miz yozvwn he. Yawjdaeuj gou baezlaeng aeu rox di saeh, lai vih bohmeh siengj cij ndaej.

（haj nienzgaep Fungz Dauh）