Haemh haenx, gou caeuq gyoengq doengzdoih guhcaemz doxndoj. Yawj ndaw hongh hoengqvangvang, gou miz di nyap lo, ndoj haeuj gizlawz bae ndei ne? Seizhaenx, gou yawjraen aen cekgaeq gok ciengz—— gizneix wnggai haemq ancienz ba. Gou ngamq gungj hwet ndonj haeuj cekgaeq bae, gyoengq gaeq couh cici caca hemq lo. Gou ganjvaiq sing iq naeuz: “ Ci, gaej hemq lo, dwg gou, cungj mbouj rox bouxcawj iq mwngz la? Gou couh ndoj youq gizneix yaep ndeu.” Mbouj rox dwg mbouj dwg caen dingq rox gij vah gou, roxnaeuz raen gou mbouj sienghaih gyoengqde, gyoengq gaeq ciemhciemh dingh roengzdaeuj lo. Gvaq yaep ndeu, gou dingqnyi sing byaij gyoengqdoih lo. Gyoengqde youq ndaw hongh ra liux le, hix mbouj siengj daengz gou ndoj youq ndaw cekgaeq. “Byaij ba, raeuz bae giz wnq ra ba!” Dingq gyoengqdoih byaij gyae le, aensim gou gaenjged haenx cij soeng roengzdaeuj. Seizhaenx, raq heiqhaeu ndeu ndonj haeuj conghndaeng gou daeuj, haeu dwk gou ganjgip ndonj ok rongzgaeq daeuj. Ciq gij rongh ronghndwen baez yawj, gou cij fatyienh gwnz ndang gou nem miz haujlai haexgaeq.

Seizneix siengj hwnj gienh saeh neix, gou lij dwg daej riu mbouj baenz. Bouxwnq ndaej hingz dwg angq- vauvau, gou ndaej hingz cix nyouq daengz gij “heiq” haeu.

(seiq nienzgaep Cangh Hauyenz)