Mwh hwnjdangz, lauxsae cam: “Gwnz faex miz aen mak ndeu, siengj aeu ndaejdaengz aen mak neix, miz geij cungj fuengfap ne?”

Neix wnggai gig genjdanh ba? Hoeng gyoengq doengzhag mwngz yawjyawj gou, gou yawjyawj mwngz, byawz hix mbouj rox baenzlawz dap.

“Daih’it cungj fuengfap, couh dwg ndwn youq laj gofaex, caj rumz bongj aenmak doek roengzdaeuj.” Lauxsae riuriu le, naeuz: “Hoeng miz mbouj miz rumz bongj, neix youz aenmbwn daeuj dingh, mbouj dwg youz bouxvunz raeuz daeuj dingh bw.”

“Daihngeih cungj fuengfap, couh dwg ra diuz faex he, aeu faex gyongz aenmak roengzdaeuj.” Lauxsae ciep- dwk naeuz, “Hoeng diuzfaex mbouj dwg seizseiz gizgiz cungj miz, neix hix mbouj dwg youz raeuz gaemguenj bw.”

Dingq gij vah lauxsae le, gyoengq doengzhag lij dwg bouxboux daengx naj mbouj rox baenzlawz guh.

“Daihsam cungj fuengfap, couh dwg hag rox bin hwnj faex bae, bin hwnj faex bae dawz mak mbaet roengzdaeuj.” Lauxsae naeuz:“Hag rox bin hwnj faex bae, neix couhdwg doenggvaq raeuz bonjfaenh roengz- rengz guh ndaej daengz.”

Gyoengq doengzhag lumjbaenz rox di lo.

Lauxsae doeklaeng naeuz:“Caj rumz bongj aenmak roengzdaeuj, couh dangq dawz minghyinh swhgeij gyau hawj aenmbwn anbaiz; aeu diuzfaex gyongz aenmak roengzdaeuj, hix dwg gauq mbouj ndaej, aenvih raeuz mbouj ndaej baujcingq seizseiz gizgiz cungj ra ndaej diuzfaex. Ndigah, guh gijmaz saeh, cungj gaej cienzbouh maq- muengh roxnaeuz gauq bouxwnq. Cijmiz doenggvaq swhgeij roengz- rengz, mboujduenh daezsang gij bonhsaeh swhgeij, swhgeij caencingq hag rox “bin hwnj faex” bae, cij dwg fuengfap ceiq ndei aeu ndaej aenmak roengzdaeuj haenx.”

Gyoengq doengzhag bouxboux cungj ngaekgyaeuj, ciepdwk sing bekfwngz yiengjsasa.

(Yij Siengz)