Vih hawj vunzlai roxyiuj dangdieg dangjveij、 cwngfuj haeuj- coengh nungzyez lajmbanj hwngfat cwngcwz caeuq ndawbiengz ginghci hwngfat saenqsik, engqgya guh ndei hong fugsaeh vunzlai, Dwzbauj Yen youq 2014 nienz 7 nyied cuengqok 《Sinhvwnz Vahcuengh Dwzbauj》 caeuq 《Gojgaeq Byayinzsanh》 daengj densi cezmuz Vahcuengh, yungh cungj feihdauh Vahcuengh nyuenz miz neix cuengqok sinh- vwnz、 gangj gojgaeq, ndaej daengz vunzlai saujsu minzcuz dangdieg haengjgyaez. Daengz seizneix, Dwz- bauj Densidaiz gaenq cuengqok 《Sinhvwnz Vahcuengh Dwzbauj》 171 geiz, gungh 1320 bien sinhvwnz; gaenq cuengqok 《Gojgaeq Byayinzsanh》 36 geiz.

Bi lai daeuj, aen yienh neix laebdaeb yungh gij yenzcwz “depgyawj saedsaeh、 depgyawj saedceij、 depgyawj vunzlai”, mboujduenh daezsang densi cezmuz Vahcuengh cizlieng, hawj densi cezmuz Vahcuengh baenz aen fuengsik vunzlai dangdieg roxyiuj caeuq senhconz cwngcwz he, hawj gij cwngcwz dangj caeuq cwngfuj raeuz daengz Mbanjcuengh gak mbanj, haekfug aenvih vah mbouj doengz mizmbangj vunzlai mbouj miz banhfap ciepsouh saenqsik vwndiz, doengzseiz hix fungfouq vunzlai saujsu minzcuz vwnzva saedceij.

(Nungz Yungjfang/农永放）