Seizcou, daj geiqciet bienqvaq gakdoh daeuj gangj baujgen, haetromh hwnqmbonq geih yawj- siuj aenndang dwgliengz.

Neix dwg aenvih, seizcou rumz liengz, bouxvunz ninz youq gwnz mbonq, ndaw ndang sup haeuj baiz ok caeuq gak aen gi- gvanh hozdung daihdaih gemjsiuj, daengzlaeng cijdan lw simdaeuz bwtdaep gag guh hozdung. Dang- yienz, ndangraeuj hix mizdi doek- daemq. Ndigah, cijnaengz baengh longzmoeg、mauzdanj doenghgij neix daeuj bauj raeuj. Mwhde doq raemhrwnh hwnqmbonq, mbouj daenj buhbeu couh bae cat heuj swiq naj, ndang couh yungzheih dwgliengz.

Seizcou giz yungzheih ndaej bingh dwg diemheiq hidungj, danghnaeuz deng rumznit, gwn gijgwn ndat roengzbae, cungj yungzheih yinxfat baenz hozgyawh fatyiemz, okyienh baenzae、ae myaiz. Ngamq hainduj dwg ae mbouj ok caemhcaiq mbouj miz myaiz, mbouj geij nanz couh ae ok myaizsaw hauret daeuj, doek- laeng myaiz cugciemh bienq- baenz henjrawq gwdlet. Dangh- naeuz mbouj yw ndei, couh rox yinxhwnj baenz cihgi’gvanj fat- yiemz roxnaeuz feiyenz, mazfanz couh daih lo.

Yihyoz daih neix nyinhnaeuz, cihgi’gvanj fatyiemz baen miz gipsingq caeuq menhsingq song cungj. Gipsingq cihgi’gvanj fat- yiemz seiz, okyienh miz ndaeng saek、mug rih、 aetcwi、 conghhoz in、 gyaeuj in、 gyaeuj ngunh、genga naet、 ndang naiq mbouj miz rengz daengj yienghsiengq, doengzseiz buenx miz ae dem. Youqgaenj seiz buenx miz aek mwnh、aek in、mbouj siengj gwn doxgaiq daengj.

Baenz gipsingq cihgi’gvanj fatyiemz seiz, daih’it aeu haeujsim gaej hawj aenndang caiq laebdaeb dwgliengz, gyanghaet hwnqmbonq aeu daenj buhbeu, gwn di gijgwn saw yungzheih siuvaq he, lai gwn raemxgoenj, bingh haemq naek seiz wng gibseiz bae yihyen genjcaz aeu yw.