Haeuj daengz seizcou le, vwnhdu doxca daih, aeu haeujsim yawhfuengz baenz mbaqnaet. Mbwn liengz lo, vunz baenz mbaqnaet hix lai lo. Cawz hoh mbaq insep le, gingzhwnj roxnaeuz iet gencueg haemq dwgrengz dwg aen cujyau biujyienh baenz mbaqnaet ndawde aen ndeu, baenz mbaqnaet caeuq gij sibgvenq mbouj ndei bingzseiz miz gvanhaeh maedsaed, gyoengq beksingq wnggai lai haeujsim cij ndaej.

Cigndaej haeujsim dwg gaej loh mbaq haeujninz. Haeuj seizcou caengz geijlai nanz, mbwn lij haemq ndat, haujlai vunz lij hai gunghdiuz ninz, neix yungzheih hawj doengjmbaq dwgliengz. Ndigah, mwh ninz seiz itdingh aeu haeujsim hoemqcw doengjmbaq ndei. Bouxcungnienz caeuq bouxlaux daegbied aeu haeujsim bauj raeuj doengjmbaq, gaej hawj rumz gunghdiuz roxnaeuz rumz denfunghsen cigciep ci daengz ndoenjhoz caeuq doengjmbaq. Linghvaih, haethaemh ok rog bae seiz ndaej daiq aen dapmbaq ndeu, yienghneix gawq ndeingonz youh ndaej baujhoh doengjmbaq.