Dangqnaj, riengzdwk rumznit ci haeuj daeuj, mbwn ciemh ngoenz ciemh liengz lo, hoeng, rumznit doiq ndang vunz gengangh hix miz itdingh yingjyangj. Aenvih seizcou mbangj bingh yungzheih fukfat, daihgya wnggai haeujsim gibseiz lai daenj buhvaq, gyagiengz lienhndang, hawj aenndang lai dingj ndaej bingh. Baenzneix, gij bingh lawz youq seizcou yungzheih fukfat ne?

Veibing: 10 nyied faenh dwg aen geiqciet menhsingq veiyenz caeuq aendungx、cibngeihcijcangz biujnaeuh fukfat ceiq hoengh, ndigah, vunzraeuz aeu habdangq camgya mbangj dijyuz lienhndang hozdung he, ngoenznaengz gwn- ndoet wng raeuj unq cit caemhcaiq yungzheih siuvaq cij baenz.

Ae’ngab: Boux baenz ae- ngab gvaq doiq givwnh、mbaeqdoh bienqvaq gig minjganj, aenndang nanz sikhab. Linghvaih, nywj roz mbaw loenq nduknaeuh lai, hix dwg gij goekgaen yaeuhfat baenz ae’ngab yenzyinh youqgaenj ndawde cungj ndeu, boux baenz ae’ngab gvaq wngdang noix bae bungqdeng gij huq neix.

Bingh sailwed sim uk: Seizcou ceiq yungzheih fat baenz cungj bingh neix, nitgyoet rox yinxhwnj gvancang doenghmeg caeugaen, cigciep yingjyangj lwed gunghawj simdaeuz yaeuhfat baenz sim geuj in roxnaeuz sim saek. Ndigah, boux baenz gvancang doenghmeg caeugaen gvaq wng gwn gij yw yw cungj bingh neix caeuq yw gyangq hezyaz, dinghgeiz bae yihyen genjcaz simdienhdoz caeuq hezyaz, cizgiz yawhfuengz baenz dwgliengz.

Dungxsiq: Seizcou mbwn liengzsangj, vunz lai gwn ndaej doxgaiq, yungzheih lanh gwn lanh ndoet, dungxsaej fudanh gyanaek, goengnaengz luenhyab, hwnz- ngoenz vaenca haemq daih, aendungx yungzheih deng liengz roxnaeuz yaeuhfat baenz gezcangz gominj, hawj saej noddoengh demgiengz cix baenz dungxsiq. Ndigah, aeu haeujsim gwnndoet gengangh, gaengawq dienheiq bienqvaq gibseiz dem daenj buhvaq.