Gou daj iq couh gig diuqbeiz, doiq gijmaz cungj gig geizheih. Cijaeu yawjraen doxgaiq moq, gou couh maij dawz de cek dwk lukluk liklik. Daxmeh cungj dwg heuh gou “lwg baihgya”, hoeng daxboh cix mbouj doengz, de cungj dwg gujli gou “baihgya”.

Geiq ndaej miz baez ndeu, gou yungh lozswhdauh caeuq fagcuiz cek aen suj moq ndeu vaih lo, gwnz dieg cungj dwg gij lingzgen gou cek okdaeuj haenx. Daxmeh yawjraen le, vix aen- gyaeuj gou ndaq naeuz:“Lwg baihgya neix, yawj mwngz guh gij saeh ndei, gou yawj daxboh mwngz dauqma baenzlawz sousib mwngz.” Gou gag rox gou mbouj deng, lauxlaux saedsaed naengh youq gungxgox caj daxboh dauqma. Gvaq yaep ndeu, daxboh dauqma lo, daxmeh sikhaek gauq naeuz: “Yawj daeglwg guh gij saeh ndei neix, caen dwg boux ‘lwg byaihgya’!” Daxboh cix mbouj hozndat saekdi, bekbek aenmbaq gou, riu dwk naeuz: “Mbouj youqgaenj law, daeglwg, mwngz cek ndaej roengzdaeuj, gou siengsaenq mwngz itdingh hix dawz de dauq cang ndei bae. Daeuj, mwngz dawz gij lingzgen gip hwnjdaeuj gonq, caiq siengj banhfap dauq cang ndei.” Youq daxboh gujli caeuq bang lajde, gou hainduj doengh uk, gaem hwnj hongdawz, menhmenh dauq cang ndei aensuj lo. Cang ndei mbat haenx, gou mbouj rox geijlai angq ha. Doeklaeng, gou youh cek vaih haujlai doxgaiq iq ndaw ranz.

Gingciengz miz vunz haenh gou coengmingz, bonjsaeh doenghfwngz ak, daxboh dingq le riu naeuz: “Neix cungj dwg gou gujli de ‘baihgya’ cij bienq coengmingz ha!”

(seiq nienzgaep Lij Fazbinh)