Miz ngoenz ndeu banhaet, gou youq laj gofaex najranz guhcaemz, sawqmwh yawjraen duz nonsei he mbouj dingz ringx bae ringx dauq. Gou byaij gyawj yawj, laxlawz dwg duz nonsei neix cingq deng duzmoed iq ndeu mbouj- dingz haeb dwk. Gou gag siengj: “Duz moed iq neix caen dwg ra dai lo. Nonsei baenzneix hung, duzmoed baenzneix iq, baenzlawz ndaej hoenx hingz nonsei ne?”

Gou daiq aen ngeizvaeg neix sijsaeq yawj. Mbouj yaep he, duz moed neix raih bae lo. Gou laihnaeuz dwg duzmoed rox nanz gag doiq bae lo, hoeng gij cingz- gingj hawj gou siengj mbouj daengz haenx yienh youq baihnaj gou. Duzmoed heuh gyoengq gouqbing he daeuj doiqfouq duz nonsei hung neix, gyoengq moed geq mbouj liux haenx dawz nonsei humx dwk, mboujlwnh nonsei baenzlawz ringx, gyoengq moed iq cungj itcig haeb duz nonsei mbouj soeng bak. Doeklaeng, duz nonseiz neix deng gyoengq moed iq haeb dai, duzmoed hoenx hingz nonsei lo.

Seizhaenx gou youh gig roxnyinh geizheih, duzmoed haeb dai nonsei le baenzlawz daeh ma ndaw rongzmoed ne? Yienghneix gou laebdaeb dinghdingh yawj gyoengq moed neix. Cij raen gyoengq moed iq miz mbangj bin daengz gwnz ndang nonsei bae, miz mbangj ndonj daengz laj ndang nonsei bae, miz mbangj youq baihnaj rag, miz mbangj youq baihlaeng nyoengx, baen- goeng cingcuj, boiqhab gig ndei, doeklaeng rag nonsei haeuj ndaw rongz bae lo.

Neix caen dwg ciengz nonsei caeuq duzmoed doxhoenx haenq he ha! Duzmoed iqet gingqyienz baenzneix doxgiet, gyoengqde yungh gij cingsaenz doxgiet caez guh hoenx hingz gunnanz, aeu- ndaej hingz. Danghnaeuz raeuz hix lumj duzmoed yienghneix doxgiet caez guh, lij miz gijmaz vwndiz gaijgez mbouj ndaej ne?

(haj nienzgaep Ginh Can)