Ngoenz he banngaiz, mbwn bumz- fubfub, seiqmwh, miz geij ndik fwn doek youq gwnz naj gou, liengzsisi. Ciepdwk, fwnmboenq doek roengzdaeuj. Gij fwn- mboenq lumj bwn duzyiengz nei, saeq lumj diuzmae, doek ndaej yied daeuj yied gip, deihdeih dedded san baenz aen muengx hung he. Fwnmboenq doek youq gwnz mbawfaex, mbawfaex engq heu lo. Fwnmboenq doek youq gwn dipva, lumj hawj dipva sieng hwnj rinbauj gak saek gak yiengh.

Youh gvaq yaep he, fwn yied doek yied hung, daihdeih cungj bienq yiengh lo. Fwnhung “vava” ciengq go dwk, gig vaiq couh dumh gaiqloh lo. Gwnz loh heiqci caeuq cidienhdoengh baebae dauqdauq, lumj gyoengq nengzgoemj caeuq gyoengq moed nei laebluenh seiqlengq deuz bae. Bakconghraemx, raemxfwn gienj baenz aen baenz aen vanlouh, geij mbaw mbawfaex gapbaenz aen gendui he youq ndaw vanlouh swnh rumz buq langh.

Banhaemh, fwn ciemhciemh dingz lo. Gou byaij ok ranz bae, hoengheiq baihrog gig singjsien, caen cwxcaih ha!

(seiq nienzgaep Lij Swjmingz)