Sujgyaj, gou ma daengz ranzcoj lajmbanj. Haemh gyanghaemh caemdingh ndeu, vunz ndaw ranz cungj ninzndaek lo, gou cix fonj bae fonj dauq ninz mbouj ndaek. Hixnaengz, gou hwnqcongz, hai aen conghcueng, yawj gij gingjsaek gyanghaemh lajmbanj.

Daengx aen daihdeih cungj deng mbwnlaep gyuemluemz, caemrwgrwg. Neix caeuq aensingz gou youq haenx gig mbouj doxdoengz. Youq ndawsingz, moix haemh cungj dingqnyi sing heiqci yiengjhuhu, aenrwz cungj mbouj ndaej dingh roengzdaeuj gvaq.

Gou muengh hwnj gwnzmbwn bae, ndaundeiq bu rim daengx aen mbwn, lumj youq gwnz muqndaem sieng hwnj baenz naed baenz naed cuenqsig. Gyoengqde youq ndaw gyangmbwn laeplat haenx yubyab rongh dwk, youh lumj lwgda lwgnyez gvaigvet yaep dwk. Aen ronghndwen venj youq gyangmbwn, ciuq ok gij rongh gig huzswnh. Laj go faex hung he, miz gij rongh ronghrib lingzlingz singsing yubyab mbin bae mbin dauq, sawj gij gingjsaek gyanghaemh lajmbanj dem le di saenzmaed he.

Najranz dwg aen huz iq caem- dingh he, naj huz dauqdingq ingj ngaeuz ronghndwen caeuq gij ndaundeiq geq mbouj liux haenx, seiqmwh, mbouj rox gijmaz doxgaiq doek roengz huz bae, naj raemx sanq ok baenz gvaengx baengz gvaengx gienluenz, gyaux soiq aenngaeuz ronghndwen caeuq ndaundeiq ndaw raemx.

Gaenhlaenz miz diuz rij iq he, sing raemx laecoco caeuq sing duzbid hemq yungzhab youq itheij, gap baenz diuz go ndaw daswyenz ndeidingq he.

Youq giz mbouj gyae miz benq ndoengfaex faexyehswj he, rongh ronghndwen ndonj gvaq geh mbawfaex, gij rongh ronghndwen couh baenz gij ngaeuz vaihlik vaihlak lo, ciuq youq gwnz dieg, lumjbaenz fuk vehcouhsieng nei. Rumziq yaengyaeng ci dwk mbawfaex, mbawfaex riengz rumz bibuengq, mbawfaex caeuq mbawfaex doxbungq, fat ok sing iq yiengj “caca”.

Gingjsaek gyanghaemh lajmbanj geijlai gyaeundei ha, hojsik, seizhaenx gingqyienz doek fwnhung lo, gou gipmuengz gven conghcueng. Mbouj rox seizlawz, gou youq ndaw sing fwn ninzndaek lo……

(Vungh Veijginh)