Haeuj cou le, mbwn ciemh ngoenz ciemh liengz, dwg aen geiqciet yungzheih fukfat baenz dungx in ndeu. Yihyoz guekcoj nyinhnaeuz, dungxsaej deng nitgyoet gig le cibfaen minjganj, danghnaeuz fuengzhoh mbouj ngamj, mbouj haeujsim gwnndoet caeuq swnghhoz gvilwd, dungxsaej couh rox okyienh fanj raemxsoemj、aek ciengq、dungxsiq、dungx in daengj bingh, roxnaeuz hawj gij bingh yenzlaiz gyanaek. Baenzneix, seizcou wnggai baenzlawz hoh ndei aendungx ne? Cujyau dwg naek youq “haj ciengx”.

Bauj raeuj hoh ciengx. Seizcou haethaemh vwnhdu doxca daih, boux baenz menhsingq dungx in gvaq haenx, aeu daegbied bauj raeuj aendungx, habseiz dem daenj buhvaq, gyanghwnz haeujninz aeu hoemq denz ndei, fuengz aendungx deng liengz yinxfat baenz dungx in roxnaeuz bingh gaeuq gyanaek.

Gwnndoet diuz ciengx. Boux baenz dungx in seizcou gwnndoet aeu gwn raeuj、unq、cit、cai、singjsien guhcawj, gwn siuj gwn lai donq, hawj ndaw dungx ciengzseiz miz gijgwn caeuq veisonh doxcung, yienghneix ndaej fuengz nemmuek aendungx deng gaet caeuq naj dungx biux naeuh le binghcingz gyanaek.

Geih bak hoh ciengx. Boux baenz dungx in aeu geih bak, gaej gwn gijgwn daiq gyoet、daiq ndat、daiq geng、daiq manh caeuq daiq niu, engq geih lanh gwn lanh ndoet, gaiq ien gimq laeuj. Linghvaih, gwn yw seiz aeu haeujsim gwn yw fuengfap, ceiq ndei dwg gwn haeux sat caiq gwn, yienghneix ndaej fuengz gig nemmuek aendungx hawj binghcingz gyanaek.

Damzdingz cingh ciengx. Conh- gyah nyinhnaeuz, fatseng caeuq fazcanj baenz dungx in、cibngeih- cijcangz biux naeuh nem gij cingzsi bouxvunz、aensim baenzlawz yiengh miz gvanhaeh maedsaed. Ndigah, aeu gangj simleix veiswngh, baujciz cing- saenz vaiqvued caeuq cingzsi onj- dingh. Gaej gaenjcieng、youcaeuz、fatheiq. Doengzseiz, haeujsim guhhong yietnaiq doxgiethab, fuengz baeg gvaqbouh dungx in nanz ndei.

Yindung cangq ndang. Boux dungxsaej miz bingh aeu giethab aenndang swhgeij cingzgvang, hab- dangq guh di dijyuz lienhndang ndeu, hawj aenndang lai dingj ndaej bingh, baujciz aenndang gengangh.