Haeuj daengz seizcou, dienheiq ciemhciemh cienj liengz, bouxvunz gwn ndaej ninz ndaej, lauz couh rom youq ndaw ndang lai, vunz ciemh ngoenz ciemh biz. Daegbied doiq mbangj vunz biz daeuj gangj, seizhah lauz hoetsuk, daengz seizcou youh dauqcungz vued hwnjdaeuj, gyahwnj seizcou gyangngoenz seizgan dinj, gyanghwnz seizgan raez ninz nanz, vunz couh yungzheih biz. Wng caijcij cosih gemjbiz cij ndaej.

Boux vunz biz seizcou wng lai gwn di gijgwn noix ndat haenx, lumj duhnding、lauxbaeg、rangzndoek、haijdai、raetmoguh、duhngaz、gyaeujsuenq、lwgmanh daengj. Danhseih vunz biz itbuen amqbak ndei, doxgaiq liengz nanz gej ndaej bak ngah. Bonjfaenh wnggai doenggvaq hableix nunaenx, hawj noh ndaej hozdung, lwed lae baedauq gyavaiq, daegbied dwg nunaenx duenh aek, mboujdanh ndaej hawj lauz baiz okdaeuj vaiq, caemh ndaej siuhauq naengzliengh, coi conghsaej noddoengh, hawj vunz lai okhaex, gemjsiuj conghsaej supsou yingzyangj doxgaiq, yienghneix couh ndaej gemjbiz lo.