Seizhah ndang vunz ok hanh haemq lai, sup haeuj caeuq baiz ok hix haemq vaiq, mbwn ndat vunz siuj gwn ndaej doxgaiq, daegbied dwg gijgwn ndat vunz engq mbouj haengj gwn lo, ndigah sup haeuj gij ndat couh haemq siuj, gyahwnj gyang- ngoenz hozdung lai, yungzheih bauj- ciz ndang reux. Haeuj daengz seizcou le, riengzdwk mbwn ciemh liengz, ndang vunz iugouz gij ndat demlai, gwn hix ndaej lai lo, sup haeuj gij ndat hix gaenriengz demlai, gyahwnj siuj yindung, vunz couh yungzheih fatbiz.

Conhgyah genyi naeuz, gemjbiz gaej laep da mbaet gwn, mboujnex yungzheih hawj menjyizliz ndang vunz doekdaemq, yungzheih baenz dwg- liengz. Ceiq ndei gohyoz banhfap dwg baujcwng cingqciengz sup haeuj gij ndat, lai ok rog ranz hozdung, guhbaenz aen gwnndoet sibgvenq ndei ndeu.

Daih’it, aeu gaijbienq lujlaj gwnndoet sibgvenq. Aenvih gijgwn caengz ginggvaq nyaij mienz couh ndwnj roengz dungx, cix mbouj naengz hawj aendungx imq vaiq, dauqfanj gwn doxgaiq ndaej lai, sup haeuj gij ndat couh lai.

Daihngeih, aeu gaijbienq ngamq gwn donq dog aen sibgvenq neix. Aenvih lauheiq sup haeuj gij ndat daiq lai, mbangj mehmbwk cijdan gwn donq haeuxcaeuz dog, baenzneix guh mboujdanh mbouj naengz gemjsiuj sup haeuj gij ndat, dungx iek gvaqbouh dauqfanj gig vunz lai gwn ndaej doxgaiq, gyahwnj gyanghaemh siuj yindung, vunz engq yungzheih fatbiz, caemhcaiq rox hawj aendungx yaeuhfat baenzbingh.

Daihsam, gaijbienq gwn saej- daeuz dingj iek caeuq bien gwn aen sibgvenq vaih neix. Gizsaed, mbouj- duenh gwn saejdaeuz dingj iek yawj hwnjdaeuj lumjnaeuz beij gwn donqcingq siuj ndaej lai, hoeng, sup haeuj gij ndat cix mbouj siuj saek di, rom youq ndaw ndang le yungzheih habbaenz youzlauz.