Miz haemh ndeu, gou caeuq geij boux doengzhag youq gvangjcangz ndaw mbanj guhcaemz doxndoj.

Baez neix, gij vunz wnq cungj deng gou ra raen lo, cijmiz Sinh Sauveih mbouj rox ndoj youq gizlawz, baenzlawz cungj ra mbouj raen de. Seizhaenx, sawqmwh dingqnyi baih diengzhaex miz vunz hemq “gouqmingh”. Dou ganjgip buet gvaqbae, baez yawj gingqyienz dwg Sinh Sauveih. Laxlawz, de siengj ndoj youq ndaw diengzhaex, hoeng aenvih mbwn laep lai, baez mbouj siujsim doek roengz gumz diengzhaex bae. De yungh rengz cukcak, lij hwnjdaeuj mbouj ndaej. Mwh dou ganj daengz, cij yawjraen aen’gyaeuj caeuq gaiqfwngz de lo. Hij Dunghsun buet daengz gaxgonq haenx mbouj goq uq caeuq haeu, ganjgip rag Sinh Sauveih hwnjdaeuj, hoeng cungj rag mbouj ndaej hwnjdaeuj. Daengz daihgya cungj buet daengz le, doxcaez rag cij rag ndaej hwnjdaeuj. Sinh Sauveih daengx ndang cungj dumz lo, de nit dwk saenzdedded. Dou ganjgip soengq de ma ranz. Gvaqlaeng, gou siengj hwnj gienh saeh neix lij caen dwglau, danghnaeuz dou caiq ceiz di daengz, doeklaeng cungj mbouj rox fatseng gijmaz saeh lo. Baezlaeng raeuz guhcaemz hix aeu haeujsim ancienz nw!

（seiq nienzgaep Gauh Yizcingh）