Daj baezgonq duzdouq caeuq duzgvi doxdax buet sat le, gaenq gvaqbae 80 lai bi lo, seizneix dwg 2080 nienz lo. Gyoengq doenghduz youq ndaw singz caep aen laeuzhung doenghduz he, gyoengq doenghduz ndaej cwxcaih haeujbae youq.

Yo, baezneix duzdouq caeuq duzgvi youq doxhenz, dwg ranznden, duzdouq siengj hwnj baez doxdax haenx hawj de gig saetnaj, de gietdingh caeuq duzgvi caiq doxdax buet ciengz ndeu. Yienghneix de couh sij diuhcansuh, de dwg yienghneix sij: Duzgvi, daeuj doxdax buet ba! Sij sat le, cuengq youq bakdou ranz duzgvi. Duzgvi yawjraen le, naeuz: “Duzdouq beixnuengx, raeuz dwg mbouj dwg gag genjcaz swhgeij loek youq gizlawz ha?” Duzdouq hozndat naeuz:“Gou cij mbouj ne, dwg mwngz wnggai gag genjcaz gij loek mwngz!” “Ndei ba, yienghneix raeuz bae gizlawz doxdax ne?” Duzgvi miz laex dwk naeuz. “Hw! Couh youq aen laeuzhung doenghduz sang 99 mij neix doxdax! Giz hainduj dwg 1 laeuz, giz satbyai dwg 99 laeuz, couh yienghneix dingh lo!” Duzdouq naeuz. “Ndei ha.” Duzgvi doengz- eiq lo. Doxdax ngoenzhaenx, duz- douq gag siengj: Gou dauqdaej ndaej bauqcaeuz siu gij saetnaj gou bae lo! De cingj duzciengh daeuj guh caizbuenq. “Bwhndei——hainduj!” Duzciengh hemq sing ndeu, duzdouq couh lumj mbin nei buet bae lo, duzgvi cix menhmenh byaij bae coh aen dendih. Duzdouq yungh 5 diemj cung cij bin daengz daih 99 laeuz. “Hahaha!! ~ gou hingz lo!” Duzdouq angq- vauvau hemq dwk. “Vei, beix- nuengx, mwngz caij deng gou lo!” Duzgvi mbouj gaenj mbouj menh naeuz. Laxlawz, duzgvi dwg naengh gauhgohgi dendih hwnjdaeuj, suzdu dangyienz beij duzdouq vaiq lo! Doeklaeng dwg duzgvi hingz lo! Gyoengq siujbaengzyoux, raeuz mbouj ndaej lumj duzdouq nei mbouj rox cauhmoq, aeu lumj duzgvi yienghneix, riengz seizdaih cinbu.

(Mungz Yiz)