“Cangh lauxsae caen dwg boux lauxsae gvaiq ndeu!” Gou dwg yienghneix bingzgyaq suyoz lauxsae.

Baez hwnj roek nienzgaep, gou couh guh ndei cunjbei yaek sij haujlai cozyez caeuq lienzguh. Byawz rox hwnj dangz daih’it, Cangh lauxsae son suyoz haenx cij louz haj diuz daez geiqsuenq. Hainduj gou mbouj gamjdaengz geizgvaiq, ndawsim gag siengj, ngamq haihag, dangyienz mbouj louz baenzlai cozyez, saedceij sinhoj dwg youq baihlaeng nw!

Hoeng, haihag gaenq ndaej ndwen he lo, cozyez lij lumj seiz ngamq haihag baenzneix noix. Gou miz di siengj mbouj doeng lo, roek nienzgaep lo, wnggai guh haujlai lienhguh cij ndaej bw, baenzlawz ndaej baenzneix soengset ne? Nanz- dauh Cangh lauxsae gaxgonq dwg son nienzgaep daemq ha? Gou yawj hix mbouj lumj, de hwnjdangz gig miz gingniemh bw. Geizgvaiq lo, gou fouznaih ngauzngauz gyaeuj.

Gij cozyez Cangh lauxsae louz haenx hix gig gvaiq. Ngamq yawj, geij diuz daez daezhingz lumj ca mbouj geijlai. Hoeng sijsaeq faensik couh fatyienh ndawde mbouj dox- doengz—— moix diuz daez cungj gak miz daegdiemj, gig noix miz doxcungz. Miz baez ndeu, gou youq niemhsuenq seiz fouzeiq fatyienh, miz diuz daez ndeu ndaej yungh song cungj fuengfap daeuj suenq, couh swnhbienh sij roengzdaeuj.

Mbouj siengj daengz, ngoenz daihngeih, Cangh lauxsae riunyum- nyum byaij haeuj gyausiz, fouqda gyaeundei riu lumj aen ronghndwen vangungj nei. Ciepdwk lauxsae naeuz: “Hagsib couh aeu lumj Lij Yijyenh yienghneix miz gij cingsaenz gaenx bae siengj.” Gangj dwk gou ndawsim angqvauvau. Doeklaeng gou moix baez guh cozyez, cungj aeu louzeiq moix diuz daez lij miz mbouj miz gij gej fap wnq.

Miz ngoenz ndeu, lauxsae lumz bonjbitgeiq youq ndaw gyausiz. Gou roxnyinh geizheih, hai daeuj baez yawj, gwnz bonjbitgeiq sij ndaej deih- deih dedded, cungj dwg daezmoeg lienhguh. Ndawde miz mbangj daez- moeg veh miz fuzhau samgak haenx, cij dwg gij daezmoeg cozyez dou. Gou cungj ngaez lo, mbouj siengj daengz lauxsae vihliux daezsang hagsib yauliz dou, roengz le baenzlai goengfou. Gou dauqcungz rox Cangh lauxsae ngoenz- ngoenz son gou haenx lo, gamjdaengz de gig dwggyaez gig hawj gou gingqcungh.

(roek nienzgaep Lij Yijyenh)