Habdangq gwn bouj ndaej hawj vunz yiengjsouh daengz feihndei doengzseiz daeuj hoizfuk rengzndang、hoh ndang ciengx ndang、fuengz bingh yw bingh, danhseih mbouj dwg naeuz vunzvunz cungj hab gwn bouj. Conhgyah genyi naeuz, gwn bouj aeu yawj vunz bae bencing doiqdaih, yienghneix cij miz yaugoj.

1、Yawj aenndang cingzgvang bae dingh. Vunzbingh lwedhaw wng senj yungh gijgwn bouj lwed haenx, lumj makdaihcauj、duhdoem daengj; vunzbingh yaemhaw wng lai senj ceh gaeujgij、beghab、megdoeng daengj. Yienghneix cij fazveih ndaej baujgen cozyung gij yw.

2、Yawj gunghcoz vanzging bae dingh. Danghnaeuz gij hong mwngz dwg youq laeng aen vanzging doeng rumz youh hawqsauj haenx, lumj rogranz roxnaeuz ndaw rug miz gunghdiuz, ndang vunz couh yungzheih canjseng heiqhuj, aeu bouj gwn di gijgwn nyinh bwt ndeu; danghnaeuz dwg ciengzgeiz guhhong youq ndaw giz nitgyoet dumzmbaeq ndawde, mwngz caiq bae yw siq huj、nyinh ciengx couh mbouj miz eiqsei lo.

3、Yawj bi’ndwen bae dingh. Bouxvunz bi’ndwen hung iq mbouj doxlumj, gwn bouj seiz hix caemh mbouj ityiengh. Lwgnding ndang haemq nyieg, senj bouj gijgwn mbouj hab daiq gyoet daiq ndat; bouxlaux dingzlai dwg daepmak mbouj gaeuq, yungh yw mbouj hab raeujsauj; mehdaiqndang geih doengh heiqdai, mbouj hab yungh gij yw vued lwed nyinh raeuz. Mwh gwn bouj seiz wnggai haeujsim gijneix.

4、Yawj diegdeih bae dingh. Mbouj doengz diegdeih、mbouj doengz heiqhaeuh diuzgen、mbouj doengz bouxvunz gwndaenj sibgvenq caemh mbouj doxdoengz, ndang vunz sengleix hozdung caeuq binghleix bienqvaq hix mbouj ityiengh. Beijlumj gizdieg dumzmbaeq, gwnndoet dingzlai dwg raeuj hawq manhget; danghnaeuz dwg youq dieg nitgyoet, gwnndoet dingzlai dwg gwn ndat caeuq nyinh nywnx. Mwh gwn gijgwn bouj seiz hix aeu ciuqei aen dauhleix neix bae guh cij baenz bw.