Seizcou mbwn liengzsangj, gyoengqvunz gamjdaengz cwxcaih haujlai lo. Danhseih heiqyiengz cugciemh caem roengz, sengleix goengnaengz caemcingx lai lo. Ndigah, vih sikhab aenmbwn bienqvaq daegdiemj, fuengz bingh souhyienz, bouxlaux wngdang haeujsim ciengx ndang cij ndaej.

1、Diuzciet gwnndoet. Seizcou, bouxlaux gwnndoet wng gwn noix gwn lai donq, lai gwn gijgwn unqmboeng sekdungx yungzheih siuvaq he. Linghvaih, aenvih seizcou mbwn hawqsauj, gwnndoet wng gwn makleiz、beghab、megdoeng、lwgcid、maenz- cienz、bwtmou、cehmbu、ngaeux guhcawj, caemhcaiq lai gwn di.

2、Diuzciengx cingsaenz. Yenz- giu ndaej rox, mbouj ndei simleix swgiz aenndang, rox hanhhaed aenndang menjyiz fuengz bingh goengnaengz, yinxhwnj raemx ndaw ndang iemq ok caeuq sup haeuj baiz ok ok luenh, bingh doq ciemq haeuj ndang bae. Ndigah, bouxlaux wnggai daegbied haeujsim cingsaenz baujgen, ndaej guh di dwkgeiz、dajveh、ciengx va ndaem nywj、ciengx roeg caemz roeg daengj vwnzyiz hozdung ndeu.

3、Haeujsim hwnq ninz. Seiz- cou aenmbwn bienqvaq haemq daih, heiqraeuj bien daemq, rumznit heiqrwix yungzheih ciemq haeuj sieng ndang, gyahwnj bouxlaux rengz dingj bingh doekdaemq, yungzheih baenz dwgliengz、saidiemheiq donh baih- gwnz ganjyenj、baenz feiyenz、sim bwt baenzbingh, caemhcaiq baenz sim nyieg oksaeh. Ndigah aeu guh ndei fuengz nit bauj raeuj, miz diuzgen seiz, ndaej aeu raemxgyoet swiq naj、raemxgyoet cat ndaeng, caemhcaiq aeu raemxgyoet dajcaemx, hawj aenndang lai dingj ndaej nit noix baenz dwgliengz.

4、Cungdenj fuengz bingh. yungzheih baenzae、dwg- liengz、 menhsingq cihgi’gvanj fat- yiemz、dungx in、baenz fungcaep、ae- ngab caeuq sim sailwed baenzbingh. Ndigah, bouxlaux aeu cungdiemj fuengz gij bingh neix.

Seizcou